Tweede kans om matriek te slaag
Debbie Schäfer, Wes-Kaapse minister vir onderwys, moedig Wes-Kapenaars wat nog nie matriek geskryf het nie, aan om aansoek te doen om hul skoolonderrig te voltooi.
“’n Groot aantal leerders kon nie hul matriekeindeksamen skryf nie of kon glad nie hul hoërskoolloopbaan voltooi nie. Baie van die leerders is nou volwassenes en wil graag hul matrieksertifikate kry om verder te studeer,” het sy gesê.
Registrasie vir die 2017 Senior Sertifikaat, wat in Mei/Junie 2018 geskryf sal word, open op 1 Oktober en kandidate het tot 31 Januarie 2018 om in te skryf.
“Ek wil graag alle volwasse leerders, wat nie hul matrieksertifikaat voltooi het nie, aanmoedig om vir die 2018 eksamen aansoek te doen. Die kurrikulum is ook dieselfde as wat die gr. 12-leerders op skool volg.”
Die volgende leerders kwalifiseer om te registreer vir die senior sertifikaat eksamens vir volwassenes:
Volwasse leerders wat 21 jaar en ouer is en een van die volgende het:
‘n Algemene onderwys- en opleidingsertifikaat vir volwasse basiese onderwys en opleiding (Abet) of
‘n Gr. 9 skoolrapport wat verklaar dat jy geslaag het.
Volwasse leerders wat 21 jaar en ouer is, wat reeds vakke vir ‘n senior sertifikaat geslaag het:
Maar nog ‘n senior sertifikaat kwalifikasie moet voltooi,
Wat ‘n onvoltooide nasionale senior sertifikaat het en wie se skoolgebaseerde assessering verval het.
In uitsonderlike gevalle kan jeug tussen die ouderdomme van 18 tot 20 jaar, wat nie op skool is nie, by die provinsiale hoof van onderwys aansoek doen om die eksamen te skryf indien hulle een van die volgende het:
‘n Algemene onderwys- en opleidingsertifikaat vir volwasse basiese onderwys en opleiding (Abet),
‘n Gr. 9 skoolrapport wat verklaar dat jy geslaag het of
‘n erkende ekwivalente kwalifikasie wat op NQF vlak 1 verkry is en twee amptelike tale daarvan deel is.
NB: Kandidate in die kategorie kan nie aanlyn registreer nie en moet ‘n registrasievorm voltooi. Leerders kan aanlyn op die Wes-Kaapse onderwysdepartement se webtuiste registreer. Gaan na op https://wcedonline.westerncape. en kliek op “Adult Matric”.