Deel van De Rust-pad oorgeteer
Die provinsiale departement van vervoer en openbare werke hou die vordering en die dienslewering van konstruksiewerk aan die N12 tussen Oudtshoorn en De Rust fyn dop. Dit blyk uit ‘n verklaring van Byron la Hoe, woordvoerder van die departement, wat verlede week aan die Oudtshoorn Courant gestuur is. ‘n Navraag is aan die departement van vervoer gestuur nadat die koerant bewerings ontvang het dat die werk aan die pad nie op standaard is nie en dat die maatskappy wat die tender ontvang het finansiële uitdagings in die gesig staar.
Die Wes-Kaapse minister van vervoer, Donald Grant, het gesê hy het La Hoe opdrag gegee om die beweringe te ondersoek en daarop te reageer. La Hoe het bevestig dat ongeveer 1,8 km van die pad wat reeds voltooi is opgegrawe en oorgedoen moes word aangesien dit nie aan die nodige kwaliteitvereistes voldoen het nie.
“Die kontrakteur is opdrag gegee dat dié deel van die pad op sy eie onkostes reggemaak moet word.”
Wat die vraag oor die finansiële situasie van die maatskappy betref het La Hoe die versekering gegee dat die nodige finansiële waarborge in plek is deeglik gemonitor word sodat daar ingegryp kan word as dit noodsaaklik is.
“Sou die kontrakteur se prestasie die dienslewering in gevaar stel, is ons bereid om verder in te gryp om ons belange sowel as die belange van die belastingbetalers te beskerm,” het hy gesê.
Die padwerke het in April vanjaar begin en volgens alle aanduidings sal dit nog vir langer as ‘n jaar duur. Motoriste word gemaan om geduldig te wees en addisionele reistyd in berekening te bring as gevolg van die padwerke.