Knights en Cobras sorg vir opwinding
Die eerste wedstryd van die Sunfoil-krieketreeks van die SA Krieketraad het uitgereën op die Rec in Oudtshoorn.
Die eerste drie van die vier geskeduleerde dae se spel, tussen die WSB Cape Cobras en die VKB Knights het egter skouspelagtige krieket opgelewer, voor reën Maandag 9 Oktober spel onmoontlik gemaak het.
Die SWD-krieketraad en Cape Cobras (Westelike Provinsie) het ‘n ooreenkoms om die gesamentlike gebruik van die twee unies se velde.
Voor skeidsregters, Shaun George en Arno Jacobs Maandag beslis het dat spel nie kan voortgaan nie, het bykans die hele tweede sessie van dag drie se spel ook uitgereën, met die Knights wie se tweede kolfbeurt van korte duur was en hul met ‘n voorsprong van 45 lopies in die kleedkamers gelaat het.
Vir die Knights het Rudi Second in die eerste kolfbeurt ‘n dubbel honderdtal (203 van 231 balle met 30 viere) aangeteken. Hy het ‘n vyfde paaltjie vennootskap van 157 lopies met Werner Coetsee gedeel. Coetsee het 62 lopies van 101 balle geslaan. Dit sluit tien viere in.
Grant Mokoena het 56 (80 balle, 6 viere, 1 ses) geslaan. Hy het ‘n tweede paaltjie vennootskap van 98 lopies met die kaptein, Pite van Biljon (56 van 117 balle, 5 viere), gedeel.
WSB Cape Cobras se Justin Ontong (64 van 92 balle, 9 viere) en Aviwe Mgijima (63 van 92 balle, 7 viere, 1 ses) het 109 om die vierde paaltjie geslaan. Vyftigtalle deur Kyle Verreynne en Dane Piedt het verseker dat die twee spanne baie gelyk was op dag drie, met die VKB Knights op 489, verklaar, en die WSB Cape Cobras op 447.
Die wedstryd het op ‘n spannende dag drie se spel uitgereën.