Sewe Oudtshoorn swembaddens oop verklaar
Dis somer en swemtyd op Oudtshoorn. Die Oudtshoorn-munisipaliteit het bykans R400 000 spandeer om te verseker dat al sewe sy swembaddens en geriewe op standaard is.
Uitvoerende burgemeester, Colan Sylvester, het Dinsdag 1 November die Kerkstraat-swembad, beter bekend onder Oudtshoorniete as die Olifantjie, geopen. Hy het ook die ses ander swembaddens, die NA Smit, Bridgton, Dysselsdorp, Bongolethu, asook die twee swembaddens by die Kangobergoord, oop verklaar. Opgraderingswerk is aan ál die swembaddens gedoen. Sylvester het gesê die gemeenskapsdienste departement is steeds besig om die swembaddens en hul geboue te verfraai. “Dit mag wees dat van dié swembaddens eers teen die begin van volgende week oop sal wees, maar sodra die werk klaar is kan almal die fasiliteite geniet.
Die direkteur gemeenskapsdienste, Thomas Matthee, het met die opening gesê die swembaddens is ‘n bate vir Oudtshoorn en toerisme. Hy het sy dank uitgespreek teenoor die munisipale raad wat geld beskikbaar gestel het om herstelwerk aan die swembaddens te doen. Hy was veral verheug oor die Kerkstraat-swembad wat na drie jaar herstel en bruikbaar is. “Die Olifantjie verlig die druk van ander swembaddens en is goed geleë vir mense om soontoe te stap.”
Matthee het bygevoeg, “Na die voorval met die NA Smit-swembaddens, is alle nodige herstelwerk gedoen. Die klein swembad is geseël en geverf en die kleedkamers het ook ‘n nuwe voorkoms gekry. Die sementblokke is ook vervang en buiteligte is aangebring.
“Die Kerkstraat-swembad het die afgelope jare baie vervalle geraak en is beskadig. Die publiek was baie ongelukkig en bekommerd oor die toestand van die Olifantjie. Algehele herstelwerk is daar gedoen, nuwe toilette is aangebring en herstelwerk is aan die dak gedoen.”
Matthee het gesê die opgradering van die swembaddens was ‘n spanpoging. Hy het al die betrokke departemente bedank vir hul harde werk.
Die tariewe van alle swembaddens is as volg: Daagliks
Volwassenes: R11,00
Studente en kinders onder 12-jaar: R3,50
Maandeliks
Volwassenes R140,80
Studente en kinders onder 12-jaar: R70.50
Seisoen tariewe
Volwassenes R294,40
Studente en kinders onder 12-jaar: R147,30
Opleidingsessies
Skole: vier ure per week (per uur) R61,50
Swemklubs: twee ×1,5 ure - R684,50
Spesiale gebeure:
Per gala: R204,80
Per biathlon gala: R108,90
Gestremdes en spesiale staatskole kry gratis toegang.