Vrou in Albertinia-distrik vermoor
‘n 52-jarige vrou se liggaam is Saterdag 28 Oktober in haar huis op die plaas Zout van die Aarde, Zoutpan in die Albertinia-distrik gevind.
Volgens die stasiebevelvoerder van Albertinia-polisie, kapt. Susan Botha het die nadoodse ondersoek Woensdag bevestig dat Sharon Lee Bester (52) verwurg is.
“’n 20-jarige verdagte is reeds gearresteer en verskyn vandag in die hof op aanklag van moord.”
Bester se lyk is deur ‘n plaaswerker gevind wat die honde moes kos gee.
“Die ambulans was reeds op die toneel toe die polisie daar kom. Volgens die paramedici was daar tekens dat sy ‘n beroerte gehad het,” verduidelik die ondersoekbeampte, a.o. Hennie de Jager.
Die plaasbestuurder het die volgende dag opgemerk dat haar voertuig, ‘n wit Landrover weg is. Verskeie ander items, waaronder ‘n skootrekenaar en selfoon is ook uit die huis gesteel, maar is weer teruggevind.
Lede van die publiek het die Landrover Saterdag naby Dekriet opgemerk en het die verdagte herken wat op Bester se plaas werk, waarop hulle die polisie in kennis gestel het. Die voertuig is Sondagmiddag ‘n entjie van die plaasopstal gevind.
De Jager het die verdagte op die plaas gearresteer en hy het van die eiendom wat hy geneem het, oorhandig. Hy het sleutels van die voertuig die vorige dag weer in die huis gaan terugsit. Hy het erken dat Bester hom in die huis betrap het toe hy geld gesoek het om diesel in te gooi, waarop hy haar verwurg het.
Die verdagte is vir moord aangekla en bykomende sake van huisbraak en diefstal, asook motordiefstal is geopen. Volgens De Jager sal hy vir regshulp aansoek doen en sal die saak uitgestel word.
Die ondersoek duur voort.