Vredestraat nou nuwe KKNK fessterrein
Die KKNK se feesterrein verskuif volgende jaar na die meer sentraal geleë Oudtshoorn en Vredestraat-sportterreine.
Dié aankondiging is hierdie week deur Rhodé Snyman, uitvoerende hoof van Kunste Onbeperk, die maatskappy wat die KKNK aanbied, gedoen.
Volgens Snyman het terugvoer van borge, feesgangers en inwoners aanleiding tot dié skuif gegee.
“Borge en feesgangers verkies ’n feesterrein wat sentraal tot die hartklop van die KKNK is en die nuwe feesterrein is dus ideaal,” sê sy.
Snyman wys verder daarop dat daar geen inwoners in die gedeelte van Vredestraat is wat tydelik gesluit sal moet word nie en dat mense dus minder verontrief sal word as tydens vorige feeste toe St Johnstraat gedeeltelik gesluit moes word.
Sy sê feesgangers sal alles waaraan hulle die afgelope agt jaar in die Rivierbuurt gewoond was, én meer, op die nuwe terrein ervaar.
“Benewens die aand- en dagverhoog, Liplekker met sy deli- en wynproeë, verskeie stalletjies, kroeë en kuier- en rusareas, verskuif die ATKV-Speelbos ook na die feesterrein.
“Die Speelbos bied ure se pret en plesier aan die jongspan, waaronder Uitkampteateraanbiedings, interaktiewe speletjies én ’n musiekprogram,” sê sy.
Die gewilde Kunsmark waar ‘n groot verskeidenheid stalletjies jaarliks is, word op die Vredestraat-sportterrein ingerig. Dié area huisves ook die pretpark en mallemeule. Kaartjies na die feesterrein sluit toegang tot ál hierdie vermaak in.
Toegang tot die feesterrein is deur hekke in Vredestraat en in Voortrekkerweg by die ingang na die REC. Hekke tot die terrein maak soggens om 10:00 oop.
Soos met vorige feeste sal die gedeelte van Baron van Reedestraat tussen Voortrekkerweg en St Johnstraat ook gesluit wees.
Enige navrae oor die nuwe terrein kan gerig word aan info@kunste.org.za of 044 203 8600.