Herstelwerk aan dam begin
Herstelwerk aan die Raubenheimerdam se hoof waterafvoer pyplyn na Oudtshoorn het begin.
Die werk volg na ‘n pypbars, waar ongeveer twee miljoen liter water per dag lek, binne die ondergrondse kanaal ontdek is.
Die herstelwerk het op Maandag 28 Mei begin na die Raubenheimerdam se afvoer toegedraai is en die dorp nou vanaf die Melvilledam van water voorsien word.
Johan Uys, bestuurder grootwaterwerke by die Oudtshoorn-munisipaliteit het tydens ‘n perskonferensie die herstelwerk as uiters sensitief en lewensgevaarlik beskryf.
“Indien iets fout gaan en die sement tussen die dam en die tonnel gee in, kan dit lewensverlies tot gevolg hê. Dit kan ook veroorsaak dat die dam binne twee dae heeltemal leeg loop.”
Uys het Dinsdag verduidelik dat boorwerk aan die beton rondom die pyplyn begin het. “Die boorwerk en die wegbreek van die beton sal na raming sowat vyf dae duur. Die vervanging van die stukkende pyp met ‘n nuwe sal ‘n verdere twee dae duur.
“Een dag word uitgesit vir die toets van die pyplyn en indien dit die toets slaag sal water dan weer vanaf die Raubenheimerdam aan Oudtshoorn voorsien word. Die bekisting rondom die pyp, die staalwerk en die invul van beton rondom die pyp sal ‘n verdere vyf dae neem.”
Uys het gesê die pyplyn vanaf die Melvilledam is heelwat kleiner as die vanaf die Raubenheimerdam. “Dit het tot gevolg dat minder water na Oudtshoorn vloei as wat die verbruik is.
“Dit kan daartoe lei dat die reservoirs se vlakke daal en dat watertekorte voorkom. Om dit te verhoed word inwoners ernstig versoek om water te spaar en geen tuine mag natgemaak word tot en met Maandag 4 Junie nie.” Die Raubenheimerdam was Dinsdag 33,73% vol.