Rioolprobleem by gholfbaan opgelos
Die probleem van rou riool wat vir ‘n geruime tyd na die Oudtshoorn-gholfbaan gevloei het, is opgelos.
Die Oudtshoorn Courant het verlede Vrydag (25 Mei) berig dat die riool uit ‘n mangat naby die terrein van korrektiewe dienste stroom en in ‘n dam by die gholfklub beland. In reaksie op die navraag het die Oudtshoornmunisipaliteit aangedui dat hulle onbewus was van die probleem en onderneem om dringend aandag daaraan te gee.
Johan Cornellissen, die gholfklubkaptein, het hierdie week bevestig dat die probleem opgelos is.
Ntobeko Mangqwengqwe, woordvoerder van die Oudtshoorn-munisipaliteit, het Woensdag verduidelik dat die betrokke rioolpyplyn in die verlede gereeld verstop geraak het. “Sowat vyf jaar gelede het die munisipaliteit en korrektiewe dienste se bestuur ooreengekom dat laasgenoemde ‘n sif by hulle perseel sal installeer wat sal keer dat ongewenste voorwerpe in die rioolnetwerk beland. Daarna het die verstoppings vir lank afgeneem.”
Johan Uys, bestuurder grootwaterwerke by die munisipaliteit, het gesê: “Ongelukkig is hierdie sif weer verwyder en het dit gelei tot verstoppings op drie plekke onderkant korrektiewe dienste. Stukke van handdoeke, komberse en selfs onderbroeke is uit die pyplyn gehaal.”
Volgens Mangqwengqwe het die munisipaliteit die personeel van korrektiewe dienste versoek om die sif terug te sit, te onderhou en gereeld skoon te maak.