George-pad word verbreed
Stemme vir die opgradering van die N12 na George het verlede week na ‘n kettingbotsing weer opgegaan.
Verskeie padgebruikers het reeds aangedui dat die pad min veilige gedeeltes het waar stadige verkeer veilig verbygesteek kan word.
Uit ‘n navraag aan die Wes-Kaapse departement van openbare werke en vervoer blyk dit dat daar moontlik goeie nuus vir padgebruikers is.
Byron la Hoe, woordvoerder van die departement, het Woensdag gesê ‘n tender is uitgegee vir die onderhoud van die pad en die kontrak maak ook voorsiening vir gedeeltes van die pad om verbreed te word. Die aanvanklike gedeelte van die pad wat deur die kontrak gedek word is 16,5 km vanaf die T-aansluiting met die Georgepad tot ongeveer halfpad na Oudtshoorn. Volgens La Hoe is die verwagting dat die kontrak teen die einde van 2018 toegeken sal word en dat werk teen die einde 2019 voltooi sal wees. Hy sê ‘n konsultant is reeds aangestel om die oorblywende gedeelte van die pad tot by Oudtshoorn te evalueer en voorleggings te maak oor verbeteringe wat aangebring moet word. Sodra die evaluasie afgehandel is sal daar besluit word watter gedeeltes verbreed moet word en huidige beplanning dui daarop dat daardie werk gedurende 2019 sal plaasvind.
De Rust-pad
Wat werk aan die pad na De Rust, wat nou reeds meer as ses maande stilstaan, betref, sê La Hoe sy departement is in die laaste stadium om ‘n kontrakteur aan te stel. Daar word beoog om die nuwe kontrakteur voor die einde van Junie op die perseel te kry sodat werk kan voortgaan.