Vandalisme by begraafplaas ondersoek
Dit blyk dat die probleem van vandalisme by die Oudtshoorn-begraafplaas uiteindelik aandag geniet. Dit volg nadat meer as tien grafstene die afgelope aantal dae beskadig is. Die Oudtshoorn-munisipaliteit het hierdie week ‘n beroep op die publiek gedoen om te help om vandalisme by die begraafplaas hok te slaan.
Die munisipale bestuurder, Allen Paulse, het Woensdag gesê: “Dit het onder ons aandag gekom dat die Oudtshoornbegraafplaas onder vandalisme deurloop. Dit is kommerwekkend dat daar in die laaste paar dae meer as 10 grafstene beskadig is.”
Paulse sê die vermoede is dat die skuldiges dit doelbewus doen. “Op hierdie oomblik probeer ons die onmiddellike naasbestaandes opspoor deur ons rekords na te gaan en hulle in te lig oor hierdie misdryf.
“Ons weet dit is baie hartverskeurend, maar ons vra u om u geliefdes se graftes te besoek om seker te maak of daar enige skade aangerig is.”
Alhoewel die voorvalle waarna Paulse verwys die afgelope tyd plaasgevind het, is die probleem van vandalisme by die begraafplaas nie ‘n nuwe verskynsel nie.
Die Oudtshoorn Courant het reeds so vroeg as 2012 berig oor grootskaalse vandalisme by die begraafplaas. Inwoners en besoekers maak gereeld melding daarvan en AfriForum het bykans drie jaar gelede reeds ‘n verslag opgestel oor die haglike toestand waarin die begraafplaas verkeer. Dit is algemene kennis dat die terrein nie beveilig is nie en dat haweloses daar slaap. ‘n Aantal maande gelede is ‘n bejaarde vrou by die begraafplaas van haar voertuig beroof terwyl sy haar oorlede man se graf besoek het.
Inwoners wat enige verdagte optrede by die begraafplaas opmerk of van nog voorvalle van vandalisme bewus is, word gevra om dit te telefonies by 044 203 3900 of per e-pos by valencia@oudtmun.gov.za aan te meld.