Volle administrasie dalk vir Kannaland
‘n Spesiale raadsvergadering, wat gister by die Kannaland-munisipaliteit sou plaasvind om die dorp onder volle administrasie te plaas, is ‘n uur voor dit moes begin tot verdere kennisgewing uitgestel.
Inwoners van Kannaland het Woensdag ‘n brief wat deur die uitvoerende burgemeester, Magdalena Barry, onderteken is ontvang waarin sy verklaar dat sy aangevra het om die dorp onder volle administrasie te plaas. Die brief is ook op ‘n plaaslike Facebook-groep geplaas.
Volgens die brief het Kannalandmunisipaliteit vir die “afgelope 12 tot 13 jaar finansiële probleme ondervind en is die munisipaliteit reeds twee keer onder administrasie geplaas”.
In Desember 2016 is die dorp deur minister Anton Bredell, onder gedeeltelike administrasie geplaas en die munisipaliteit het toe ook ‘n finansiële herstelplan ingevolge die intervensie aanvaar.
“Die skaal van wanbestuur, bedrog en korrupsie wat die vorige administrasie gekenmerk het, het ons verplig om gedurende 2016 ‘n volledige forensiese ondersoek aan te vra,” lui Barry se brief.
Volgens haar het dit uit dié ondersoek geblyk dat finansiële wanbestuur van R15 miljoen gepleeg is en kriminele klagtes is gelê.
Sy sê verder dat die huidige raad met die 2016-verkiesing die munisipaliteit met R69 miljoen se skuld oorgeneem het, maar dat hulle sedertdien daarin kon slaag om ‘n groot deel van die skuld af te betaal.
Verder sê sy ander probleme wat die munisipaliteit in die gesig staar is onder meer die voertuigvloot wat in ‘n baie swak toestand is en die munisipaliteit minstens R20 miljoen gaan kos. Die opgradering van paaie en ander infrastruktuur kan ook nie geskied nie omdat daar nie geld in die begroting is nie.
“Die plaaslike ekonomie is afhanklik van ons waterbergingskapasiteit, veral in Ladismith. Daarom benodig ons dringend ingryping op nasionale vlak om die befondsing te verseker vir suksesvolle oprigting van die Swartbergdam-projek, sowel as die opgradering van die Ladismithafvalwateraanleg.”
Sy erken ook dat die publiek se vertroue in die munisipale amptenare se vermoë om hul eie sake te hanteer uiters laag is. Sy voeg verder by dat politieke leierskap in die raad, sy as burgemeester, die munisipale bestuur en die speaker voortdurende gedreig word ten spyte van verskeie kriminele klagtes wat reeds gelê is.
“In die lig van bogenoemde is ek daarom geen ander keuse gelaat om te versoek dat die munisipaliteit onder volle administrasie geplaas word, aangesien die huidige gedeeltelike administrasie langer sal neem om die verlangde doelwitte te bereik, soos in die bestaande finansiële herstelplan gelys,” sluit sy af.