Motorwagte nou gemonitor
Die Oudtshoorn-sakesektor se motorwagte word nou gemonitor en werk volgens regulasies soos aan hulle uiteengesit.
Onderhoude is met die vorige motorwagte gevoer en agtergrondinligting oor hulle ingesamel, waarna 15 van hulle met amptelike motorwag-glimbaadjies uitgereik is.
Die amptelike motorwagprojek is op Donderdag 31 Mei bekendgestel.
Ntobeko Mangqwengqwe, woordvoerder van die Oudtshoorn-munisipaliteit, het verduidelik dat die baadjies van een tot 15 genommer is en elke motorwag met ‘n aanstellingsertifikaat, asook ‘n vorm met reëls en regulasies waarvolgens hulle moet werk, uitgereik is.
“Die program is ‘n gesamentlike projek tussen die munisipaliteit, die polisie en die besigheidskamer. Daar is ‘n lang waglys van mense wat amptelike motorwagte wil word. Indien enige van die 15 nuutaangesteldes die reëls oortree, sal hul vervang word met iemand op die waglys.”
Die motorwagte sal konsentreer op sekerheid in die sakesektor, wat Hoogs-, Kerk-, St. Johns- en Baron van Reedestrate insluit.
Mangqwengqwe verduidelik dat die motorwagte nie ‘n salaris verdien nie. “Hulle maak staat op fooie, maar mag nie bedel nie.”