R30 Miljoen vir droogte- verligting
Die Oudtshoorn munisipaliteit het R30 miljoen van die nasionale departement water en sanitasie vir droogte verligting ontvang.
Volgens die munisipale bestuurder, Allen Paulse, is die groot uitdaging nou hoe om die geld binne die kort voorgeskrewe tyd van drie maande te bestee.
“Die bedrag is te min vir die beoogde pypleiding vanaf die Blossoms-boorgate en daar sal na ander opsies gekyk moet word,” het Paulse tydens Maandag se raadsvergadering gesê.
Die aangeleentheid het ‘n lang debat ontlok rondom ‘n aanbeveling van die voorsitter van tegniese dienste portefeuljekomitee, Johan Fourie, dat afgewyk word van die plan om ‘n noodpypleiding vanaf Blossoms na ‘n reservoir wes van die dorp aan te lê en liewer gekyk word na die grondwater ontwikkeling op Jan Fourieskraal en Waterkloof in die distrik en water deur middel van ‘n 6 km-pypleiding te pomp na ‘n water behandelings aanleg van die Klein Karoo Water skema wat sowat R 30 miljoen sal kos.
ANC-raadslid Henry Tyatya, het beswaar gemaak omdat hy en nog ander raadslede nie weet waar Jan Fourieskraal en Waterkloof geleë is nie. ”Ons weet nie wat daar aangaan nie,” het Tyatya gesê en voorgestel dat raadslede daarheen geneem moet word.
Hy stem saam dat drastiese stappe geneem sal moet word om die waternood aan te spreek, maar dat volle besonderhede en al die nodige inligting aan die raad voorgelê moet word.
“Daar is baie om te verduidelik,” het hy gesê.
Paulse het verduidelik dat niemand weet hoeveel ondergrondse water by Blossoms is nie en dat ‘n volledige studie sowat vyf jaar sal neem.
Hy het saamgestem met Tyatya dat raadslede behoorlik ingelig moet word om ‘n deurdagte besluit te kan neem.
Vlancio Donsosn (Icosa) het gesê die wet gee die munisipaliteit die reg om grond te vat van diegene wat nie hul samewerking wil gee nie.
“Ons kan onteien sonder vergoeding indien grondeienaars nie grond aan die munisipaliteit wil verkoop nie.”
Hy wou ook weet wanneer die raad aan die bou van ‘n nuwe dam gaan dink en beweer dat mense water steel by die dorp se hoof waterbron, die Raubenheimerdam, asook by Blossoms.
Beide Donson en Tyatya het versoek dat die raad ook moet kyk na plaaslike diensverskaffers.
Rdl Maggie Titus (ANC) het gewaarsku dat raadslede nie met woorde moet speel nie. “Ek het baie in die tronk geleer,” het sy van haar laat hoor.
Goedkeuring vir die aanwending van die geld moet volgens Fourie van die departement water en sanitasie, die WesKaapse departement plaaslike regering en ander rolspelers verkry word.
Die aangeleentheid is uiteindelik vir ‘n volledige verslag tot 16 Oktober uitgestel.