Karwag van die maand gekies
Joseph Stoffels is Woensdag aangewys as die dorp se karwag van die maand.
Stoffels is ‘n bekende gesig in die dorp en staan al jare op sy pos in Kerkstraat voor Spar.
Hierdie is die inisiatief van die Oudtshoorn-besigheidskamer, in samewerking met Oudtshoorn-polisie en die Oudtshoorn-munisipaliteit.
Volgens Hennie Davel, ‘n lid van die besigheidskamer en die persoon in beheer van die projek, hoop hulle om die karwagsituasie in die dorp te verbeter.
Davel sê karwagte word ook deur die munisipale verkeersbeamptes en die polisie gemonitor.
“Die karwagte wat nou in die strate is ontvang gereeld opleiding. Ons motiveer hulle om hul werk reg te doen, sober en nugter te wees en nie te bedel nie. Hulle kry nuwe bippies met die munisipaliteit se logo op. Elke karwag het ook ‘n nommer wat op die bip aangedui word en ‘n naamplaatjie wat aan die bip is.”
Davel sê die publiek kan help om elke maand die karwag van die maand te kies.
“Indien iemand dink die persoon moet karwag van die maand wees moet hulle ons laat weet. Hulle kan ook klagtes na my, die polisie of die munisipaliteit stuur. Enigiemand wat ‘n klag wil indien of iemand wil nomineer moet die straat se naam waar die persoon diens doen, die karwag se naam en bippienommer saam stuur.” Nominasies kan aan info@y-not. co.za gestuur word.