Waternood vir boere groter as ooit

Terwyl veeboere in die Klein-Karoo vanjaar deur bemiddeling van verskeie instansies voer ontvang het, was daar nog geen verligting vir besproeiingsboere nie.

Ten spyte van reën wat oor baie gebiede uitgesak het, het dit nie ‘n noemenswaardige verskil aan die vlak van besproeiingsdamme gemaak nie. Die Raubenheimerdam wat drinkwater aan Oudtshoorn, Dysselsdorp en De Rust lewer, het tans 44% water.

Die Stompdrifdam het tans 5,99% water, terwyl die Kammanassiedam 4,47% het. Die twee damme vorm die StompdrifKammanassie Watergebruikersvereniging (SKWGV) wat water aan 150 boere langs die Olifants- en Kammanassierivier vanaf die damme tot by Calitzdorp Spa by Calitzdorp lewer.

“Ons damme is vir die afgelope twee jaar konstant op ‘n baie lae vlak van enkelpersentasies en dit beteken dat boere op sowat 13 500 ha vir hierdie tyd geen stoorwater uit die skema ontvang het nie,” sê Riaan Krüger, bestuurder van die SKWGV.”

Uitstaande waterbelasting

“Omdat die boere nie kan besproei nie, raak die vereffening van waterrekenings al verder agterstallig en tans is meer as R2 miljoen uitstaande,” sê Krüger. Boere wat 180 dae agterstallig is, kan hul reg om water uit die skema te ontvang verbeur en aan die SKWGV se regsverteenwoordigers oorhandig word. Die wanbetaling en ander ekonomiese faktore het daartoe gelei dat die SKWGV reeds vyf van die 19 voltydse werkers moes aflê; poste van toesighoudende personeel kan ook in die gedrang kom indien die situasie nie verbeter nie.

Soek dringend hulp

Intussen soek Krüger finansiële hulp van verskillende landbou-instansies, soos die Wes-Kaapse landboudepartement, Casidra en Sansor, ‘n sambreelorganisasie van saadproduksiemaatskappye.

“Die Wes-Kaapse departement van landbou het ons verwys na die nasionale departement van water en sanitasie, maar die departement het sy eie finansiële uitdagings. Casidra se mandaat maak voorsiening vir werkskepping vir werklose mense, maar nie vir werkers wat tans in die diens van die SKWGV of boere is nie.” Krüger het Sansor versoek om die verskillende saadmaatskappye in die streek bymekaar te kry om te help om water uit die Oranjerivierskema na die Klein-Karoo te versprei, soos die geval is met water vir die Sondagsriviervallei in die Oos-Kaap. “Ons het die infrastruktuur van damme, betonkanale en slote, asook ‘n goed-bestuurde skema om water uit die Oranjerivier na ons boere te versprei. Hierdie water kan produksie vertiendubbel en duisende nuwe werkgeleenthede skep, met gepaardgaande welvaart vir almal.” Sansor het nog nie terugvoer gegee nie.

Kontak Riaan Krüger by 044 272 2751 of stompkam@absamail.co.za vir meer inligting.

Die Raubenheimerdam wat drinkwater aan Oudtshoorn, Dysselsdorp en De Rust lewer,

het tans 44% water.