Laaste wedstryde in 190’s-spankompetisie
Taai tennis word Saterdag op Mosselbaai verwag wanneer die laaste ronde wedstryde in vanjaar se 190’s-spankompetisie van die Eden Seniors-tennisvereniging gespeel sal word.
Die wedstryde word op die bane van die Mosselbaai en Hartenbos-tennisklubs gespeel.
Altesaam 28 spanne, sestien mans- en twaalf vrouespanne neem deel.
Die verdedigende kampioene in die A-afdeling, die vrouespan van Maryna Olivier (kapt.), Christine van Coller, Elmarie Lategan en Rida Bester, en die mansspan van Jacques de Beer (kapt.), Wimpie Helmand, Charl Opperman en Daan Spengler, sal alles uithaal om hul titels te behou.
Olivier se span loop gerieflik voor met 215 punte teenoor die 191 van die span van Debra Hyde terwyl De Beer se span met 160 punte twee punte minder op die punteleer het as die span van Willie Breytenbach wat met 162 punte spog.
In die B-afdeling (mans) is dit die spanne van Hugo van der Berg (162 punte) en Louis du Preez (160 punte) wat om die wennerstrofee spook.
Die span van Helena Haasbroek spog reeds met 265 punte en sal moeilik ingehaal word.
Wedstryde begin stiptelik om 09:00 en spelers moet reeds om 08:00 die Mosselbaai-tennisklub aanmeld. Die prysuitdelingsfunksie vind onmiddellik na die laaste wedstryd plaas.