Besoedeling van rivier steeds kopseer
Die besoedeling van die water in die Grobbelaarsrivier word deur die weermagbasis veroorsaak en die munisipaliteit se hande is feitlik afgekap. So het Paul Müller, senior bestuurder: strate en stormwater, van die Oudtshoornmunisipaliteit verlede Vrydag tydens ‘n perskonferensie gesê.
Müller het egter beklemtoon dat dit nie rou riool is soos wat baie inwoners dink nie, maar wel vuil kombuis- en waswater wat weens rioolverstopping op die terrein van die Infanterieskool in ‘n stormwaterpyp beland en die water dan in die Grobbelaarsrivier by die hangbrug loop.
Volgens Müller het die munisipaliteit sowel as Garden Routedistriksmunisipaliteit reeds ‘n gesprek hieroor met die weermag gevoer, wat openlik is oor die probleem en bereid is om verstoppings sonder versuim te herstel.
Volgens Müller is die basis ‘n nasionale sleutelpunt waar die Oudtshoorn-munisipaliteit en distriksmunisipaliteit geen jurisdiksie het nie.
Hy verduidelik dat die geringste rioolverstopping op die basis daartoe lei dat kombuis- en waswater van soldate in die stormwaterstelsel van die munisipaliteit beland en in die Grobbelaarsrivier by die hangbrug gestort word.
Hy sê hoewel die weermag baie simpatiek staan teenoor die probleem, is infrastruktuur in die basis oud en kort dringend onderhoud.
Die hangbrug is ‘n nasionale erfenisgebied met talle gastehuise in die omgewing en die stank is by tye ondraaglik.
Hangbrug
Oor die hangbrug in Kerkstraat wat onlangs herstel is nadat boosdoeners talle van die loopplanke verwyder het, se Müller dat daar reeds weer van die planke voete gekry het. “Dit is ‘n groot probleem en ons het die publiek se hulp nodig om die kwaaddoeners vas te trek.
Hy het ‘n beroep om Oudtshoorniete gedoen om die munisipaliteit te help om die booswigte vas te trek. “Die hangbrug is ‘n nasionale gedenkwaardigheid en toeriste aantreklikheid wat bewaar moet word.”
Probleem by kruising van Van der Riet- en Baron van Reedestraat
Die Oudtshoorn-munisipaliteit wil graag die probleem van ongelukke by die kruising van Van der Riet- en Baron van Reedestraat oplos, maar het daarvoor die samewerking van inwoners in die omgewing nodig het Müller gesê.
Volgens hom kan die verwydering van ‘n groot blombak deel van die oplossing wees.
Hy is van mening dat die verwydering daarvan die draai groter sal maak en ongelukke verminder.
Die munisipaliteit is egter onseker watter sentimentele waarde die blombak moontlik vir inwoners in die omgewing het en sal graag insette wil kry oor wat om daarmee te doen.
“Dit is ook ‘n feit dat ongelukke vermy sal word indien motoriste en vragmotorbestuurders by die spoedbeperkings hou.”
Vierrigtingstoptekens by twee
kruisings oorweeg
Die munisipaliteit oorweeg dit sterk om vierrigtingstoptekens by die kruisings van Buitekant- en St Johnstraat asook by Jan van Riebeeckweg en Rademeyerstraat aan te bring sê Jean Cox, bestuurder: strate en stormwater van die munisipaliteit.
Volgens Cox is stappe in die verband reeds ver gevorder en kan dit moontlik binne die volgende maand ‘n werklikheid word. Verskeie ongelukke het reeds in die verlede by die twee kruisings plaasgevind.
Mense wat insette wil lewer kan Müller by 044 203 3000 skakel.