Deon Meyer by Leesfees vereer
Die Wes-Kaapse regering gaan die spanningsverhaalskrywer Deon Meyer vanjaar op die Prins Albert Leesfees vereer vir sy uitnemende rol om die geskrewe woord te bevorder.
Herman van der Westhuizen van die kantoor van minister Anroux Marais, WesKaapse minister van sport en kultuursake, het aan
Oudtshoorn Courant gesê dié kantoor wil erkenning gee aan hom “vir sy lewenslange prestasie in die literêre kunste”.
Sy splinternuwe spanningsroman, Prooi, het die afgelope Maandag boekwinkels se rakke getref en het reeds uitstekende resensies ontvang. Vir die Leesfees is dit dus ’n besondere eer dat dié geleentheid een van die eerstes is waar Meyerbewonderaars meer oor die boek – en die man agter die verhale met hul spannende storielyne – te hore kan kom.
Meyer se boeke is ook sy uitgewer NB (Human & Rousseau) se topverkoper. Volgens Eben Pienaar, reklame-enbemarkingshoof, het Meyer 27 uitgewers wêreldwyd en word daar gemiddeld 50 000 eksemplare van ’n Meyer-boek net in Afrikaans verkoop. Andrew Brown het in ’n resensie in Rapport die afgelope Sondag geskryf dat Prooi ’n “snaarstywe plot het, geloofwaardige karakterisering en spontane, naatlose skryfwerk”.“Dis klassieke Deon Meyer, maar dis ook ’n grensverskuiwende roman,” skryf Brown.
Meyer tree twee keer by die Leesfees op. Op die openingsaand gaan sy medespanningsromanskrywer Bettina Wyngaard hom uitvra oor sy lewe en loopbaan as skrywer en sy gewilde karakter, die speurder Bennie Griessel wat moordondersoeke op ’n soms onkonvensionele manier doen. Op Saterdag 4 November tree Meyer ook op as deel van ’n paneel spanningsverhaalskrywers: Wyngaard van Grabouw, Jo Nel van Mosselbaai en Martin Steyn van Somerset-Wes.
Nel het onlangs gedebuteer met Die hond wat ophou blaf het en Steyn bring ook ’n kraakvars misdaadroman na Prins Albert, naamlik Losprys. Wyngaard se nuwe spanningsroman, Jagter, verskyn vroeg aanstaande jaar. Nog ’n gewilde sessie waarin die persoonlikheid van misdadigers ontleed gaan word, is dié van Julian Jansen
(Die De Zalze-moorde) en André le Roux (Narsiste, psigopate, stalkers en sadiste).
Die Leesfees-organiseerders het weer probeer om die bespreking van hoofsaaklik splinternuwe boeke vir die fees te reël – of om vanuit nuwe hoeke te kyk na boeke wat reeds ’n rukkie op die rak is. Dit sluit in Dennis Cruywagen se The Spiritual Mandela, wat nou oorsee versprei word. Dawid van Lill, oudradioman en skrywer, tree in gesprek met Cruywagen. Hulle onderwerp is: Versoening of rassehaat: Waarom Malema Mandela se erfenis wil vernietig.
Volgens die reëlingskomitee het die formaat van die fees nie verander nie, wel die aanbiedingsplek, omdat die fees jaarliks groei en meer plek vir feesgangers nodig geword het. Daar sal ook oorgenoeg te eet en te drink wees, met kosentrepreneurs van Prins Albert wat gaan sorg dat jy nooit honger ly nie, asook ’n kontantkroeg. Die fees vind plaas met die ondersteuning van die Prins Albert Landbougenootskap en skoukomitee wat die hele terrein, gespreksaal en restaurant bestuur.
Musiek word vanjaar deurgaans in die restaurantruimte deur die groep Orwellington aangebied. Die digter-sanger Jolyn Phillips gaan soms by hulle aansluit.
Die Prince albert Leesfees vind van 2 tot 4 November plaas.
Vir die volledige program en besprekings, laai die Prins Albert Leesfees-App af by Google Play. Besoek www.princealbertleesfees.org vir alle kontakbesonderhede.
Sy splinternuwe spanningsroman,
het die afgelope Maandag boekwinkels se rakke getref en het reeds uitstekende resensies ontvang.