Luiperd bring verrassingsbesoek
Nadat Sylvester die leeumannetjie sowat drie jaar gelede die Karoo Nasionale Park landwyd in die nuus gehad het met sy wanderlust, het nog ‘n kat nuus gemaak. Hierdie keer is dit die opwagting van ‘n luiperd wat die personeel van die park laat regop sit. Die luiperd is vroeër vanjaar op beeldmateriaal van ‘n veldkamera vasgelê.
Die kamera is deur prof. Jan Venter en dr. Craig Packer van die Nelson Mandela Universiteit in Port Elizabeth opgestel om wild in die park te monitor.
Volgens Riaan Nel, senior veldwagter, is dit van die enkele foto duidelik dat die sterk nek en kop dié van ‘n volwasse mannetjie is.
Die teenwoordigheid van die luiperd op die fotomateriaal was ‘n groot verrassing vir Nico van der Walt, bestuurder van die park. Volgens hom was daar nog nooit enige tekens van luiperds in die park sedert dit in 1971 tot stand gekom het nie.
Dit is bekend dat daar vroeër luiperds in die Nuweveldberge rondom die park voorgekom het, maar destyds is na hulle verwys as “tiers”.
Abraham de Klerk van die plaas Hooyvlakte, waarop Beaufort-Wes tot stand gekom het, het glo teen 1804 nege “tiers” gesien.
Dis nie duidelik wanneer die laaste luiperd in die berge gesien is nie, maar sowat 25 jaar gelede het ‘n motoris glo een op die N1 noord van Beaufort-Wes waargeneem.
Die luiperd het vermoedelik uit die NoordKaap of die berge van die Klein-Karoo of Suid-Kaap gekom, maar dit is bespiegeling.
Navorsing dui daarop dat die Wes-Kaap se luiperds omtrent die helfte kleiner is as luiperds wat in die noordelike provinsies voorkom, en hulle weeg gemiddeld sowat 35 kg; die wyfies is sowat
5 kg ligter. ‘n Volwasse luiperdmannetjie se loopgebied is sowat 200 vk km. “As hy nog hier is, sal ons hom dalk op die kameras sien wanneer ons die foto’s weer in November aflaai,” sê Nel.
Volgens Nel sal die luiperd, wat op ‘n kamera in die Kookfonteinarea van die park gekiek is, waarskynlik ‘n koedoe in die rivierlope plattrek. “Wanneer ons leeuvangste naloop is daar gewoonlik so min van die karkasse oor dat dit moeilik is om vas te stel of dit ‘n leeu of luiperd se werk was. Luiperds is opportunistiese jagters en sal enige prooi vang wat oor sy pad kom.”
Volgens Van der Walt sal dit interessant wees om vas te stel hoe wyd hierdie luiperd rondloop, en of hy gekom het om te bly. Hy versoek dat enigiemand wat dalk ‘n luiperd sien die parkpersoneel by 023 415 2828 sal kontak.