Calitzdorp-kelder vier 90 jaar
Calitzdorp-kelder het Vrydagaand sy 90ste bestaansjaar tydens ‘n glansgeleentheid met sowat 60 gaste gevier. Calitzdorp Vrugte Uitvoerders Koöperatiewe Maatskappy Beperk is op 17 Februarie 1928 geregistreer met die doel om die vrugte in die vallei uit te voer. Maar toe die Tweede Wêreldoorlog die uitvoere bemoeilik, het die lede besluit om die statute van die maatskappy so te wysig dat daar ook ‘n parskelder bedryf kon word om die hantering van vrugtemos, wyn en brandewyn in te sluit, en die naam is verander na Calitzdorp Vrugte en Wynkelders Koöperatiewe Maatskappy Beperk. Danie van der Westhuizen, keldermeester sedert Desember 2017, het ‘n oorsig oor vanjaar se oes gegee. “Die tonnemaat was af weens die droogte, en die klein korreltjies het nie gelyk ryp geword nie. Van hulle is afgesny om die stokke te spaar.” Tog is hy tevrede met die kwaliteit van die druiwe en die wyn, wat spreek uit die talle toekennings wat vanjaar ontvang is. James O’Kennedy, wynmaker tussen 1975 en 1990, was een van die eregaste. “Oom James het die grondslag van die kelder gelê en hy het nie draaie geloop met sy uitsprake oor lewerings nie,” het Klokkie Fourie, voorsitter van die direksie gesê. “Hy het geglo druiwe is óf reg, óf stookgraad. Dankie vir die fondament wat jy gelê het – destyds as ‘n koöperasie, nou ‘n maatskappy. Wynmaker Alwyn Burger kon net aangaan met die goeie werk wat jy begin het.” Burger kon ongelukkig nie die geleentheid bywoon nie.
Volgens Fanie Geyser, direksielid, moet ‘n bedryf diversifiseer om te oorleef. “Wat in 1927 begin het as ‘n vrukteverpakkingskoöperasie, het deur die jare en ten spyte van uitdagings, gegroei tot die formidabele kelder wat dit vandag is. Ons het ‘n geskiedenis van 90 jaar.”