Inligtingsdag verloop glad
Sowat 70 groentesaadprodusente het verlede Woensdagmiddag ‘n inligtingsessie op Johan en Romana Strasheim se plaas Te Vrede op Kruisrivier bygewoon.
Die inligtingsessie het Klein Karoo Saadproduksie se jaarlikse erkenningsaand voorafgegaan. Pieter Burger van KKSP het meer vertel oor die Israeliese benadering tot bestuiwing, Strasheim het die voordele van vogmeters (probes) uit eie ervaring bespreek, en Gielie Basson van Agri
Soil het die voordele van beroking in grondvoorbereiding toegelig.
Suksesvolle bestuur van bye vir bestuiwing berus op verskeie faktore, soos die teenwoordigheid van veldblomme, die sinkronisasie van die blomfase, die beste tyd om korwe in te bring, die beheer van peste soos varoa en byevangers, en die korrekte besproeiing. “Voldoende water is nodig vir die vorming van nektar en aantreklikheid van blomme gedurende bestuiwing,” sê Burger.
Dit is die byeboer se verantwoordelikheid om seker te maak dat die korf op standaard is en dat die korwe op die korrekte plekke geplaas word. “‘n Gesonde korf het ten minste agt rame vol bye waarvan vier tot ses rame eiers, jongbye en larwes in verskillende stadiums van ontwikkeling moet bevat.”
Volgens Strasheim kan sekere produksiefaktore soos die beskikbare geld, grond, tyd en kwaliteit beheer word, maar “daar is net soveel water”, wat hy met grondvogmeters in sy saadlande bestuur.
Omdat die grond op ‘n plaas en selfs in dieselfde land verskil, is dit ideaal om meer as een vogmeter in verskillende dele van ‘n land te hê. Die vogmeters versamel 24/7 data wat uiteindelik op ‘n rekenaarskerm (of selfoonskerm) aantoon wat die voginhoud van die grond is, waaruit bepaal kan word wat die optimale hoeveelhede water in watter deel van die land benodig word.
Volgens hom is dit verkieslik om ook ‘n reënmeter en thermometer aan die stelsel gekoppel te he ten einde vas te stel wat reënval en temperatuur op grondvoginhoud en plante se ontwikkeling het.
Strasheim glo sy uitstekende opbrengs is te wyte aan goeie waterbestuur. “Tegnologie is oënskynlik duur, maar die vraag is hoe duur dit is om nie hierdie tegnologie te benut nie.”
Maar al is die tegnologie in plek, is dit belangrik om self te gaan kyk wat in die landerye aangaan om sodoende die “persoonlikheid” van elke aanplanting te bepaal!
Kontak Pieter Burger by 044 203 5100 vir meer inligting.