Rugbyspeler steeds vermis
Vyf dae nadat ‘n rugbyspeler van Bridgton rugbyklub, Gaylon Piedt (26), verlede Saterdag in die see by Wilderness verdwyn het, was sy liggaam teen gister steeds nie gevind nie. Piedt en ‘n groep vriende was Saterdag op ‘n uitstappie by Leentjiesklip in Wilderness toe hy onder die water verdwyn het.
Die NSRI het Saterdag om 11:45 hulle reddingsboot sowel as hulle reddingsvoertuig ontplooi toe hulle die oproep van Piedt se verdrinking ontvang het. Volgens die NSRI kon hulle in samewerking met die polisie, nie die liggaam opspoor nie. Sedertdien het polisieduikers verskeie kere sonder sukses na die liggaam gesoek.
Die feit dat sy liggaam nog nie gevind is nie, maak die situasie vir almal wat vir hom lief is, ongelooflik moeilik. So sê
Andrea Jooste, Piedt se verloofde.
“Hy sou Saterdag teruggekom het, maar toe kry ons die tyding dat hy verdrink het. Hy en sy vriende het gaan swem. Sy een vriend het verduidelik dat Gaylon tot by die klippe gaan swem het en onder die water ingegaan het. Hy het opgekom, maar weer onder die water verdwyn. Dit was die laaste keer wat hulle hom gesien het.”
Jooste sê die Nasionale Seereddingsinstituut is sedert Saterdag nog elke dag besig om na hom te soek.
“Die feit dat ons nie weet waar hy is nie maak dit só moeilik. Om hom te verloor is klaar erg. Dit voel of iemand ‘n stuk van my weggeruk het. Sy pa, Henry Jafta, is steeds daar en het Saterdag gesê hy kom nie huis toe voor sy seun gevind is nie.”
Jooste sê Piedt was nie net die liefde van haar lewe nie, maar ook haar beste vriend. “Ons gaan al van skool af uit. Hy het my gekies bo almal en sedertdien staan hy my met als by. Ek was swanger met my oudste kind, Charlin (7). Gaylon is die enigste pa wat sy ken. Hy maak haar groot asof dit sy eie kind is. Sy noem hom pappie. Hy sou die week na haar prysuitdeling gegaan het, maar ek het nie eens kans gehad om hom te vertel dat sy ‘n sertifikaat gaan kry nie. Ons kleintjie, Lameez, is vier jaar oud.
Ek moet sterk wees vir my kinders, maar dit is so vreeslik moeilik omdat ons nie kan berusting kry nie. Hy was die beste pa vir sy twee kinders en die beste man waarvoor ek kon vra. Hy was die liefde van lewe.”
Jafta was gister steeds in George waar hy wag op nuus van sy seun. Piedt se ma is ‘n aantal jare gelede oorlede.
Piedt was deel van die Bridgton-rugbyklub waar hy as losskakel en senter gespeel het. Die klubvoorsitter, Benito Metembo, het hierdie week gesê die voorval is vir die klub baie hartseer.
“As klub wil ons dankie sê aan sy familie wat hom toegelaat het om vir ons te speel en op so ‘n manier deel van sy lewe kon wees. Ons wens hulle sterkte toe in hierdie moeilike tyd en hulle kan verseker wees dat hy altyd ‘n boy van ons sal wees.”