Arende oordonder, maar nie verneder nie
Ons het nou ‘n proesel van Premierliga-rugby gekry, maar ons moet brutaal eerlik hieroor wees: die Arende is nog nie reg om op dié vlak mededingend te wees nie.
Só het Rynhard van As, hoofafrigter van die SWD Arende, aan die George Herald gesê nadat die Vrystaat Cheetahs hulle Dinsdagaand in Bloemfontein in‘ n promosie relegasie wedstryd met 36-5 geklop het.
Dus behou die Vrystaat hul Curriebeker-status in die Premierliga terwyl die Arende hul kroon in die Eerste Liga gaan verdedig.
Vooraf het min mense die Arende ‘n wenkans gegee hoewel die SuidKaap heimlik op ‘n wonderwerk gehoop het. Maar dit was die Arende, wat vanjaar ‘n skitterseisoen agter die rug het, nie beskore nie. In hul belangrikste wedstryd van die jaar, dié uitspeelstryd in Bloemfontein, was die hekkie veels te hoog en kon hulle nie hond haaraf maak teen die Vrystaat wat sy grofgeskut ingespan het nie.
Die Vrystaat, angsbevange dat die onbesonge besoekers uit die SuidKaap hom uit die Curriebeker se topliga sou boender, het sy span met sy Pro14-groep versterk en ook twee Springbokke in sy span ingesluit. En dis glo nie net in Bloemfontein waar daar rondgeskarrel is om te verseker die Vrystaat bly in die Premierliga nie... Met soveel op die spel, veral vir die Vrystaat, was daar van aanskoulike spel maar min te sien.
Die eerste helfte was saai en albei spanne het met oorhaastige spel onnodige foute gemaak. Oorgretigheid by die afbreekpunte en ook op die aanval het talle belowende bewegings laat skipbreuk lei. Tog het mens half verwag die Vrystaat, met sy volle arsenaal tot sy beskikking, die Arende soos ‘n wegholbrand sou tref. Met hul oorheersing van alle fasette van die spel moes die tuisspan teen rustyd (19-0) verder voorgeloop het.
Die Arende se grootste kopseer was swak dissipline en die skeidsregter, Jaco Peyper, het hulle genadeloos gestraf. Soms dalk te straf. Die onkantreël is, wat die tuisspan betref, suinig toegepas.
Die Arende-stut, Gift Sofisa, is met ‘n geelkaart vir herhaalde oortredings in die skrums afgestuur en toe die Vrystaat kort daarna ‘n strafdrie as pasella kry, was die koeël deur die kerk.
Die Vrystaat het die Arende toe behoorlik in die skrums opgekeil. En die bietjie momentum wat die Arende opgebou het, is met beserings versteur.
Een daarvan aan die Arende se besielende kaptein en haker, Jacques Vermaak.
Teen die einde het die Arende verwoed aangeval en verskeie belowende bewegings in die Vrystaat se kwartgebied aanmekaar geslaan, maar hulle kon net nie afrond nie.
Ses drieë teenoor die Arende se een - deur die plaasvervanger-senter Vuyo Mbotho het die Vrystaat se oorheersing onderstreep.