Bomfopper laat polisie skarrel
‘n Fop bomdreigement na die polisie se beheerkamer het Woensdagoggend dienste by twee sakeondernemings en drie instansies tot stilstand gebring.
Volgens sers. Gretchen Michaels, woordvoerder van die Oudtshoorn-polisie, het ‘n man Woensdagoggend omstreeks 09:00 die polisie geskakel en gesê daar is vyf bomme geplant. Die bomme was glo by die Thusong-sentrum en die department van binnelandse sake in Bongolethu, SuidKaap Kollege in Adderleystraat, Checkers en Shoprite. Volgens Michaels het die man sy stem vermom om soos ‘n buitelander te klink.
“Ons het onmiddellik voertuie na die onderskeie plekke gestuur om die geboue te ontruim terwyl snuffelhonde en speurders begin het om die plekke een vir een te deursoek.”
Die span is eers na die Thusong-sentrum toe, daarna het binnelandse sake aan die beurt gekom. In die middedorp is Checkers eers deursoek, gevolg deur Shoprite en daarna die kollege. Studente wat by die kollege besig was met eksamenskryf het ‘n aantal benoude minute ervaar terwyl hulle vertrekke eerste deursoek is sodat hulle met die eksamen kon voortgaan.
Geen ploftoestelle of verdagte voorwerpe is by enige van die plekke gevind nie en teen 10:30 kon normale aktiwiteite by die onderskeie plekke voortgaan.
Volgens die polisie word geen dreigement ligtelik opgeneem nie, maar hulle hou ook in gedagte dat bomdreigemente soms gemaak word om ander misdadige aktiwiteite te verbloem. As voorsorg hiervoor is polisievoertuie na die ingange van die dorp gestuur om voertuie te monitor en op die uitkyk te wees vir enige verdagte optrede.
Om bomdreigemente te maak is ‘n misdaad en oortreders kan ernstige vonnisse opgelê word indien hulle skuldig bevind word.