Twee vas moord op matrikulant

Die twee mans van Oudtshoorn, wat ‘n 19-jarige matrikulant aangerand en hy aan ‘n steekwond in sy nek gesterf het, is in die Oudtshoorn-streekhof aan moord skuldig bevind.

Vonnisverrigtinge is vir ‘n proefbeampteverslag uitgestel. Streeklanddros Sylvia Mandla, het bevind dat Richard Manel (40) en Shaun Nagel (39) verantwoordelik was vir die dood van die 19-jarige Angelo Manewille toe hulle op 28 Julie 2018 in Springbokweg, Bridgton met hom in ‘n bakleiery betrokke was.

Sy het Manel en Nagel se verweer dat hulle uit selfverdediging opgetree het en nie kon verduidelik hoedat die oorledene aan sy beserings gekom het nie, verwerp.

Voorts het sy die getuienis van Anthony Prins, wat die bakleiery vanaf sy stoep dopgehou het, as betroubaar bevind.

Prins het getuig dat hy gesien het hoedat Manel die oorledene met ‘n skerp voorwerp steek.

Hy het kalm getuig en nie homself tydens kruisondervraging weerspreek nie.

“Die getuie het geen rede of motief gehad om die beskuldigdes valslik te beskuldig nie en daar is dus geen rede om nie sy weergawe te aanvaar nie,” het die landdros gesê.

‘n Seun wat glo deur die oorledene beroof is, is nie deur die staat of die verdediging geroep om te kom getuig nie.

Die landdros het bevind dat Manel die steekwonde toegedien het en

Nagel hom daarmee vereenselwig het.

“Dit is volgens getuienis voor die hof duidelik dat die beskuldigdes se lewens nie in gevaar was nie en hulle nie eerlik was met die hof nie.

“Hulle moes voorsien het dat die oorledene aan die steekwonde kon sterf en die hof is tevrede dat die staat sy saak bo redelike twyfel bewys het. Die beskuldigdes het met ‘n gemeenskaplike doel opgetree en word aan moord skuldig bevind,” het die landdros gesê.

Vonnisverrigtinge is op versoek van die twee se regsverteenwoordiger, Vaughan Shone, vir ‘n proefbeampte verslag tot 12 Oktober 2020 uitgestel.

Brandon Smith het vir die staat verskyn en Ao Piet Hendricks was die ondersoekbeampte.