Nood leer bid en alternatiewe soek
Vir sommige ondernemings was Covid-19 'n verdoemende slag, maar vir ander was dit die aansporing om kreatief te dink. Met die droogte van die afgelope aantal jare het landbou en veral die wynbedryf in die Klein-Karoo reeds 'n moeilike 2020 in die gesig gestaar en toe slaan Covid-19 toe. De Krans wynkelder op Calitzdorp was een van die landbou-ondernemings wat planne moes beraam.
"Dit was sink of swem, finansieel en emosioneel, as ‘n besigheid, as ‘n span en as individue. Ons hele bistro, wynproelokaal en plaaslike wynverkope was gesluit met geen lig aan die einde van die tonnel nie," sê Boets Nel, eienaar van De Krans. Hy verduidelik dat hulle eerste prioriteit was om die 29 permanente werkers in diens te hou en dat dit beteken het hulle moes produktief ingespan word.
"Ons kon nie wyn verkoop nie en items soos ou houtvate, kurke, leë wynbottels en natuurlik wingerdlote was volop en ons het koppe bymekaar gesit om hierdie herwinbare items in iets bruikbaar en aantreklik te omskep en so is die Bloeiselprojek gebore," verduidelik hy.
Volgens Nel het die personeel van De Krans se bistro en proelokaal saamgespan om produkte te ontwerp en te maak.
Hy sê die projek was 'n uitdaging, want skielik moes kokke, kelners en wynpakkers ’n nuwe handvaardighede aanleer en verborge talente ontdek. Daar is op die naam Bloeiselprojek besluit omdat die gewilde Bloeiselfees wat reeds vir jare aangebied word, vanjaar waar die appelkoosbloeisels die mooiste in jare is, deur Covid-19 gekelder is. "Alhoewel die grendeltydperk ons lewenstempo aansienlik stadiger gemaak het, het die tempo van werk nie afgeneem nie. Die snoei van wingerde vir die 2021 oes en alle ander werk moes soos gewoonlik voortgaan.
"Ons hoop dat hierdie projek sal ontwikkel in ‘n deurlopende winterprojek tydens die maande wanneer dit normaalweg stil is by die bistro en die wynproelokaal. Ons is ook opgewonde om ‘n positiewe bydrae te maak om besoedeling te bekamp, deur aan te hou om hoofsaaklik herwinbare materiale te gebruik vir ons projek," sê Nel.
"Met die afwesigheid van internasionale toeriste, het ons nederig afhanklik geword van ons plaaslike besoekers om ons deur hierdie moeilike tyd te kry. Ons wil opreg dankie sê vir elkeen se deurlopende, volgehoue en lojale ondersteuning."
Volgens Nel kon hulle daarin slaag om al 29 permanente werknemers wat na 120 familielede omsien, te behou. Die produkte wat as deel van die Bloeiselprojek gemaak word is tans slegs by De Krans se proelokaal en bistro op Calitzdorp beskikbaar.