Burgersdorp het noodplan

Burgersdorp het onlangs ‘n noodplan aangekondig om die Covid-19-uitbraak te temper.

“Die voorkoms van Covid-19 onder die inwoners in Burgersdorp het nou ‘n vlak van 906 per 100 000 bereik. Die Joe Gqabi-distriksmunisipaliteit oorweeg ‘n algehele inperking,” het Zolile Williamson, munisipale bestuurder, meegedeel. Daar was reeds vanaf Julie en Augustus uitbrake van Covid-19 in die dorp, en omliggende distrik en die reuse tekort aan water vererger die situasie.

Volgens Williamson het inwoners slegs toegang tot water vir sewe ure per dag elke tweede dag. Volgens inwoners het baie dele sedert die begin van 2020 slegs vir twee ure per dag op elke tweede dag water.

Noodherstelwerk aan elektriese toerusting by boorgate, en onderhoudswerk by die Chiapinnisklipdam word gedoen in ‘n poging om hierdie waterbeperkings mettertyd hok te slaan.

Die styging in Covid-19-gevalle het tot 229 toegeneem sedert leerders by ‘n skool positief getoets het en verdere verspreiding onder hul gesinne en kontakte waargeneem is.

Volgens Williamson was die distriksmunisipaliteit nie by magte om die waterbeperkings op te hef tydens die grendeltyd nie, aangesien daar eenvoudig nie genoegsame water beskikbaar was vir al die inwoners nie.