Verkeersafdeling onder groot druk
Met groot getalle mense wat daagliks in lang toue by die verkeersafdeling wag, is die munisipaliteit verbind tot beter dienslewering ten spyte van uitdagings.
In 'n persverklaring Dinsdag het Aurelia Oliphant, kommunikasiebeampte van die munisipaliteit, gesê waarnemende munisipale bestuurder, Gerald de Jager, het self die lisensiekantore besoek om vas te stel hoe die proses bespoedig kan word.
Volgens Oliphant is een van die knelpunte dat daar slegs drie kassiere is waarvan twee tans in Covid-19-isolasie is. De Jager bedank inwoners vir hulle geduld en moedig hulle aan om hernuwingsaansoeke elektronies te doen.
"Om nie in lang toue te wag nie, het die Oudtshoorn-munisipaliteit via 'n aanlynproses 'n prosedure vir hernuwing van voertuiglisensies geïmplementeer. Dit vat ‘n paar minute om dit aanlyn te doen en u kan u voertuiglisensie binne drie dae afhaal by die verkeersdepartement sonder om in die ry te staan,” noem De Jager.
Volgens Oliphant help die lisensieafdeling ongeveer 270 mense per dag by motorregistrasies, met rybewyse en die voertuigtoetsstasie. In Julie is 2 286 motorregistrasies en 1 567 rybewyse gedoen en in Augustus het dit verdubbel na onderskeidelik 5 119 en 3078. In September was daar 6 693 motorregistrasies en 1 559 rybewyse.
Nog 'n uitdaging volgens Oliphant, is motorhandelaars wat groot getalle voertuie het om te registreer en om dit aan te spreek is die munisipaliteit besig om te onderhandel om spesiale tye oor naweke oop te wees, maar oortyd van personeel bly 'n uitdaging. De Jager gee die versekering dat die munisipaliteit voort sal gaan om ander opsies te ondersoek om die agterstand wat tydens grendeltyd opgebou het, in te haal.
Inwoners wat registrasies aanlyn wil doen kan die webwerf https://online.natis.gov.za/#/ besoek.