KKConnect vind volhoubare oplossings vir voedselhulp
’n Nuutgestigte nie-winsgewende organisasie op Oudtshoorn, Klein Karoo Connect (KKC), het 'n oplossing gevind om voedselprojekte wat kos aan minderbevoorregtes skenk, volhoubaar te maak.
Volgens Louise Venter, 'n lid van KKC, is die groep gedurende die grendeltydperk gestig.
"Gedurende die grendeltyd het 'n gesamentlike inisiatief, Covid-19 Voedselhulp, die lig op Oudtshoorn gesien. Dit was grootliks deur die Oudtshoornbesigheidskamer, die Wes-Kaapse departement van sosiale ontwikkeling (DSO) en die munisipaliteit gedryf. Hulle het, met die ondersteuning en hulp van plaaslike besighede soos onder meer Wilck Spar, Oudtshoorn Spar, Shoprite, Pick ’n Pay, Wes-Handelshuis, Camp Roadhouse en Checkers reeds duisende mense van voedsel voorsien. Ons, die Oudtshoorn Rotariërs, Round Table, Vryburgers, die St. Luigi Scrosoppi Sorgsentrum, KKNK, ReWOLusie en talle ander besighede en individuele vrywilligers het elk op ons eie manier ook by die voedselhulp-projek betrokke geraak, maar, hoewel dit 'n reuseverskil aan mense se lewens gemaak het, was dit nie volhoubaar nie."
Volgens haar het hulle gesien dat daar ’n mate van sentralisasie nodig was om al hierdie voedselhulppogings te koördineer en om meer volhoubare oplossings te vind sodat die breër gemeenskap almal daarby sou baat, ook nadat die inperking verby is.
Volgens nog 'n lid, Bernard le Roux, het hulle met die hulp wat hulle gedurende die grendeltyd gelewer het, besef dat hulle op die langtermyn meer volhoubaar aan die voedselhulpkwessie aandag sal moet gee.
Klein Karoo Connect het daarom by die Spensplaas-inisiatief op De Rust gaan kers opsteek met die idee om iets soortgelyk op Oudtshoorn te begin. Spensplaas is 'n groentetuin wat op 1 ha grond buite De Rust gevestig is en wat deur die gemeenskap bewerk en versorg word.
"Mense kan op verskillende maniere by die Spensplaas-projek baat vind. Jy kan in die groentetuine werk en in ruil vir jou diens deel in die oes of jy kan ’n bekostigbare maandelikse bedrag betaal en in ruil daarvoor vars organiese groente uit die tuine kry. Die tuine word natuurlik ook gebruik om voedselhulp te verleen. Plaaslike besigheidsman en KKC-vrywilliger, Johan van der Westhuizen, het vir ons grond vanaf Henry en JP van der Westhuizen bekom en ons kon nou begin om op die 1 ha grond groente in siklusse te plant om te verseker dat daar regdeur die jaar groente beskikbaar sal wees vir oes,” sê Le Roux.
Die eerste oes behoort in Desember te wees en daar word gehoop dat daar in die toekoms nog tuine sal wees.
Le Roux en nog ander rolspelers, is besig om inligting in te win en ’n databasis op te stel van wie almal by voedselhulp in die Groter Oudtshoorn-area betrokke is. Ook, om ondermeer te bepaal waar die grootste behoefte is en waar die afsetpunte is.
Diegene wat ’n bydrae tot die voedselhulpinisiatief of die groentetuin-projek wil maak, kan met KKC kontak maak op hul Facebook-blad, ’n e-pos stuur aan info@kleinkarooconnect.co.za of stuur 'n WhatsApp na 082 461 2346.