Spesialis gaan na kruising kyk
Die kruising van Baron van Reede- en Van der Rietstraat was weereens die onderwerp van verskeie gesprekke die afgelope drie weke en dit het daartoe gelei dat die munisipaliteit hierdie week op ‘n aksieplan besluit het om die kruising veiliger te maak. Daar is besluit om‘ n verkeer s spesialis aan te stel om ‘n ondersoek by die kruising te doen. ‘n Ondersoek sal ook gedoen word by die hoek waar Parkweg en Rademeyerstraat by mekaar aansluit, waar verskeie ongelukke ook reeds voorgekom het.
Volgens Ntobeko Mangqwengqwe, kommunikasie beampte van die Oudtshoorn munisipaliteit het die burgemeester, Chris Macpherson, die verkeershoof, Pat Jordaan en Paul Muller, senior bestuurder van paaie, Dinsdag die twee plekke besoek.
Die studie wat gedoen sal word, sal ‘n akkurate telling van voertuie en voetgangers sowel as die tipe voertuie wees. Volgens Muller sal hierdie inligting tesame met munisipale en provinsiale wetgewing gebruik word vir voorleggings van moontlike oplossings.
“Daar kan verwag word dat ‘n konsepbeplanning teen die einde van Julie gereed sal wees,” sê Mangqwengqwe.
Verskeie sakemense, inwoners sowel as die Oudtshoorn-besigheidskamer het die afgelope drie weke hulle stemme dik gemaak oor die aantal ongelukke wat veral by die kruising van Baron van Reede- en Van der Rietstraat voorkom. Daar was die afgelope maand reeds drie botsings by dié kruising.
Uit gesprekke met verskeie partye die afgelope week het Oudtshoorn Courant bevestig dat, alhoewel Baron van Reedestraat ‘n provinsiale pad deur die dorp is, die bestuur daarvan‘ n munisipale verantwoordelikheid is. Die provinsie dra wel ‘n groot gedeelte van die onderhoudskoste by, maar vir alle praktiese doeleindes is dit ‘n munisipale pad.
Statistieke oor die aantal ongelukke by die kruising is baie moeilik om te versamel aangesien dit nêrens op ‘n gesamentlike elektroniese databasis vasgevang is nie. Wat wel genoem kan word is dat Oudtshoorn Courant bewus is van ongeveer 20 afsonderlike botsings by die kruising oor die afgelope aantal jare. Drie van hulle was in die afgelope maand. Dit beteken nie dat daar geen ander botsings was nie.
‘n Inwoner, Leon Coetzee, wat op die hoek van Baron van Reede- en Van der Rietstraat woon, het aan Oudtshoorn Courant genoem dat hy van mening is dat slegs ‘n verkeerslig die probleem sal oplos.
“As mens na al die moontlike rigtings kyk waarin voertuie vanuit Baron van Reedestraat en Van der Rietstraat kan ry en draai, beteken dit ‘n arme ou wat byvoorbeeld by die stopstraat in Van der Rietstraat sit, word gekonfronteer met ongeveer nege moontlike opsies van wat aankomende bestuurders kan doen.
Op ‘n manier moet die verkeer wat met Baron van Reedestraat langs ry, by daardie kruising tot stilstand kom. Ek dink werklik ‘n verkeerslig is ‘n sinvolle oplossing.”
Uit gesprekke met kundiges soos verkeersbeamptes en amptenare blyk dit egter dat dit nie so eenvoudig is nie. “Mens moet onthou dat ‘n stopstraat of ‘n verkeerslig by een kruising die verkeerspatroon en verkeersvloei van ‘n groot gedeelte van ‘n pad raak, nie net die spesifieke kruising nie,” was een se mening.
Die onderneming van die munisipaliteit om ‘n spesialis aan te stel om na oplossings vir die kwessie te soek is goeie nuus vir inwoners en van hulle het die hoop uitgespreek dat daar ook in die toekoms na die kruising van Bloemstraat en Langenhovenweg asook Rademeyerstraat en Langenhovenweg gekyk sal word.