Gemeenskap span saam na brand
PRINS ALBERT - Twee gesinne van die woonbuurt, Noordeinde, moes verlede Donderdag hulpeloos toekyk terwyl hulle skakelhuise in vlamme opgaan.
Inwoners van die dorp het kort na die brand ingespring en saamgestaan om die slagoffers te help.
Die inwoners van die twee skakelhuise het al hulle besittings in die brand, wat die eiendom binne minute verswelg het, verloor. Altesaam drie strukture is totaal in puin gelê. Twee gesinne is dakloos en sonder enige besittings gelaat.
Die liefdadigheidsgroep van die dorp, The Thursday Group, asook ’n inwoner, Howard Mollisson, het dadelik ingespring en kos, komberse en klere vir die slagoffers ingesamel. Die oorsaak van die brand is nie bekend nie en geen klag van brandstigting is gelê nie, het die woordvoerder van die plaaslike polisie, sers. Nico April, by navraag gesê.
Volgens die munisipale bestuurder, Anneleen Vorster, het die plaaslike owerheid na die brand gehelp om die perseel op te ruim en skoon te maak.
“Die munisipaliteit het nie ’n rampfonds nie en het ’n beroep op die gemeenskap gedoen vir ondersteuning. Inwoners het toe voedsel, klere en beddegoed verskaf. Van die munisipale personeel het voedselondersteuning verleen.
Die munisipaliteit het die Odendaalgemeenskapsaal in die dorp as tydelike vesting aangebied, maar die slagoffers het verkies om by familie en vriende te gaan bly.”
Sy sê die Prins Albert-munisipaliteit het by die provinsiale departement behuising aansoek gedoen vir brandnoodpakkette. “Ons wag nog op terugvoer in dié verband.”