Verkragter kry 25 jaar
OUDTSHOORN - ‘n Man van Welbedacht, in die Oudtshoorn-distrik, wat aan verkragting skuldig bevind is nadat hy sy saamleefmaat met ‘n stok verkrag het, is Vrydag in die Oudtshoorn-streekhof 25 jaar gevangenisstraf opgelê.
Streeklanddros Daniel Boks het met vonnisoplegging van Johannes Dondas (35) gesê dat hy geen berou vir die weersinwekkende, wreedaardige misdryf wat hy gepleeg het toon nie ten spyte van die verdoemende getuienis teen hom.
Sy weergawe dat hy niks aan die vrou gedoen het nie is verwerp omdat hy die enigste persoon was wat op Sondag 20 Oktober 2019 saam met haar in hul kamer was.
‘n Buurvrou, Maria Jordaan, het getuig dat sy die betrokke middag, omstreeks 15:00, na Dondas se huis gegaan het waar die klaer haar meegedeel het dat Dondas haar twee keer met die stok verkrag het.
Haar broek was vol bloed en sy het erge pyn gehad.
Volgens Dondas het die klaer op ‘n stuk hout wat plat op ’n trappie gelê het, geval en hy het nie beserings of bloed aan haar gesien nie.
Dr. Odette Pfeifer het getuig dat dit onmoontlik is vir iemand om soveel beserings te kan opdoen deur op ‘n stok te val. Die beserings wat sy opgedoen het was lewensgevaarlik.
Die staatsaanklaer, Nadia Arnolds, het die hof vir lewenslange gevangenisstraf gevra omdat geen wesenlike of dwingende omstandighede bestaan om daarvan af te wyk nie.
Die landdros het gesê dat Dondas die vrou se hele lewe verwoes het.
Sy moet nou lewenslank ‘n stomasakkie dra en self skoonmaak. Sy is skaam, hartseer, huil nog gereeld daaroor en bly meeste van die tyd by die huis.
Die hof het in ag geneem dat Dondas ‘n eerste oortreder is en afgewyk van die voorgeskrewe minimum vonnis van lewenslange gevangenisstraf ten spyte van al die omstandighede. Dit is ook skokkend dat die beskuldigde tydens vonnisoplegging gelag het.
“Die hof moet ‘n boodskap uitstuur dat die soort misdaad nie geduld kan word nie en die gemeenskap nie die reg in eie hande neem nie. Die meriete van die saak verskil van ander verkragtings omdat ‘n voorwerp gebruik is om die vrou te penetreer,” het die landdros gesê.
Dondas is ook onbevoeg verklaar om ‘n vuurwapen te besit.