Helpende Hand reis deur Oos-Kaap
Drie vroue van Solidariteit Helpende Hand het duisende kilometers deur die Oos-Kaap gereis om takke te besoek en ‘n beter begrip te kry van die omstandighede waarin mense wat swaarkry, leef.
Marlene Basson, Oos-Kaapse streekbestuurder van Solidariteit Helpende Hand, Madeleine Swanepoel (Solidariteit Helpende Hand-maatskaplike dienste Noord-Kaap) en Lizé van Zyl (nuut aangestelde Solidariteit Helpende Handmaatskaplike dienste vir die Oos-Kaap) het die afgelope week dié verkenningstoer deur die Oos-Kaap onderneem.
Hulle het al die Helpende Hand-takke in die Oos-Kaap oor ‘n tydperk van 10 dae besoek om vir Lizé aan die takvoorsitters en bestuurslede voor te stel en ook onderhoude te voer waar nodig. Daar is ook besoek gebring aan talle Ons Winkeltakke en raad en leiding is gegee waar nodig.
Hulle was in Patensie, Hankey, Humansdorp, Jeffreysbaai, Uitenhage, Jansenville, Aberdeen, Graaff-Reinet, Middelburg, Hofmeyr, Cradock, Somerset-Oos, Despatch en Port
Elizabeth.
“Ons het duisende kilometers afgelê, gelag, gekyk, gesels en idees uitgeruil,” sê Basson.
Skole is ondersteun met skenkings, takke is besoek en gesprekke is met bestuurslede en maatskaplike werkers gevoer.
“Ons het ook die Ons Winkels van Helpende Hand en netwerke besoek en dan nog so ’n paar ondersteuners ook gewerf. Hoewel ek nie eintlik enige besoekpunt kan uitlig nie, was die besoek aan Huis Welverdiend in Jansenville en die talle takke van Ons Winkel regtig vir ons hoogtepunte,” vertel Basson.
“Dit is dikwels in die kleinste, armste dorpies, waar ons die meeste aktiwiteit opspoor en waar Helpende Hand-lede saamwerk om ‘n ligpunt in omgewings soos in Jansenville, Hofmeyr en Aberdeen te skep.
“Dit is wanneer Helpende Hand-lede deur hul betrokkenheid by dié mense hulle uit die duisternis lig, dat Helpende Hand sigbaar raak en ons meer lede kan werf wat voel dat hulle ook wil deel wees van positiewe opheffingswerk.”