Hungry Lions verskeur Spartans in Vlakkiekrieket
OUDTSHOORN - Die voormalige OPLvlakkiekrieketkampioene, Hungry Lions, het verlede Sondag by die oop stuk veld langs Bridgton-kliniek gewys dat daar nog baie byt in sy blaf is toe hy die Spartans oortuigend met 52 lopies geklop het.
Die Spartans het die loot gewen en tot hul spyt, die Lions ingestuur om eerste te kolf. Lions kon in hul 20 toegelate boulbeurte ‘n redelike mededingende 86 lopies aanteken waarvan hul o.19 Proteaspeler, Tyrese Karelse, 24 lopies bygedra het. Spartans se kolfbeurt kon van meet af nie hond haaraf maak nie, en is vir 37 lopies in die 16de boulbeurt, almal uitgeboul.
Lions se boulers, wat verwoesting met die bal gesaai het, was Juan Murphy (drie paaltjies), Jean Claud Lucas (twee paaltjies) en Tyrese Karelse (twee paaltjies). In nog ‘n wedstryd wat op dieselfde veld gespeel was het die nuwelinge van die liga, Old Crocks Ostrich Giants voortgebou op hul goeie begin toe hulle die Firestones-span (verdedigende kampioene) met 11 lopies verslaan het.
Die Crocks het ‘n uitdagende 99 lopies in hul kolfbeurt gemoker met veral Merlin Masimala wat met sy flitsende kolf (52 lopies) die grootste skade aangerig het. Ondanks dié kolfaanslag het Firestones se Franklin Stuurman met (drie paaltjies vir 10 lopies) en Damion Esau (twee paaltjies vir sestien lopies) boulsyfers geëindig.
Firestones se kolfbeurt het katastrofies begin met die toporde wat gesamentlik slegs 11 lopies kon aanteken. Was dit nie vir weerstand deur Petrus Fredericks (38 lopies) en Damion Esau (18 lopies) sou die nederlaag veel erger gewees het.
Die verdedigende kampioen kon sedert die aanvangs van vanjaar se OPL-liga nog geen wedstryd wen nie. Volgens hul kaptein, Johben Barends, is hy glad nie bekommerd oor sy span se vertonings nie.
“Ons is tans besig om sleutelspelers te roteer, maar ons is baie na aan ons ideale 11-tal.
Vir ons is daar dus geen rede om bekommerd te wees nie omdat ons in beide ons verloorwedstryde steeds goeie krieket gespeel het. We will be back. My eie kolfvertonings behoort ook binnekort te kliek,” het hy gesê.
In nog ‘n wedstryd het die Dream Team die Legends met 9 paaltjies geklop.