Spring Roses verower OLFA-Liga
Vreugdevure het Sondag hoog in Dysselsdorp gebrand nadat die Spring Roses-sokkerklub hul eweknie van Black Eagles in die eindstryd van die OLFA-liga (Oudtshoorn Plaaslike Sokkervereniging) op Dysselsdorp-stadion met 5-1 afgeransel het.
Met hierdie oorwinning het Spring Roses ‘n wisseltrofee plus R10 000 prysgeld ingepalm. Elke speler en beampte het ook ‘n goue medalje ontvang. Spring Roses sal OLFA later vanjaar verteenwoordig tydens Safa Edenuitspeelwedstryde vir ‘n plek in die streekliga wat in Plettenbergbaai gespeel sal word.
Die Super Strikers-sokkerklub (ook van Dysselsdorp) het dieselfde punte (35) na 14 wedstryde gehad.
Super Strikers het op die veld langs Spring Roses, teen Springbok gespeel en hulle ‘n loesing van ses doele teenoor nul gegee. Albei klubs het dus met hul onderskeie oorwinnings met 38 punte na 15 wedstryde geëindig, maar omdat Spring Roses se doelverskil 35 doele is teenoor Super Strikers se 30, is Spring Roses as die ligawenners vir die 2020/2021 seisoen gekroon.
In die wedstryd tussen Spring Roses en Black Eagles was dit reeds in die eerste helfte duidelik dat Roses in ‘n klas van hul eie is. Roses se puik beheer oor die sokkerbal het die skare se tone gereeld laat krul van pure lekkerte. ‘n Aspek wat ook in Roses spel uitgestaan het was hul fisiese houding in die kontaksituasies. Die manne in pienk het nie ‘n duit teruggestaan vir hul opponente nie en het selfs in die lug deurslaggewende balle keer op keer gewen wat die doelskoppers gereeld in gunstige posisies in die 18 area-strafgebied geplaas het. Vir hul ondernemende spel is Roses met drie doele teenoor die een van Black Eagles in die eerste helfte beloon.
Die tweede helfte was soos verwag, eenrigtingverkeer met Roses wat met nog meer selfvertroue gespeel het - tot groot vermaak van die skare wat weens Covid-19-regulasies aan die buitekant van die heining, die wedstryd moes kyk. Roses het nog twee doele bygevoeg wat die eindtelling op 5-1 gebring het. Vir Roses het Henry Korkee (twee doele), Corné Bessie, Johannes Kortie en Jason Maquassa elk ‘n doel aangeteken. Altesaam 16 spanne, het vanjaar deelgeneem aan die toernooi wat spanne van Dysselsdorp, Oudtshoorn,
De Rust en Kammanassie ingesluit het. Oudtshoorn se twee verteenwoordigende spanne, Athletico en Bongolethusokkerklubs, het onderskeidelik in die 11de en 12de posisie op die punteleer geëindig.