Aalwyneiland in lushof omskep
CRADOCK - Vroeër jare het hierdie eiland by Frerestraat as die roostuin bekendgestaan.
Só vertel ‘n inwoner, Rita Botha, wat oorkant die pragtig versorgde aalwyneiland bly.
Omdat niemand enige instandhouding gedoen het nie, het die tuintjie mettertyd baie agteruitgegaan en het later net uit gras en bossies bestaan.
“Die gemeenskap van Cradock waardeer regtig insette, soos hierdie gewaardeerde poging deur ‘n baie besige en aktiewe lid van die gemeenskap, Celest Lombard. Nie alleen bedryf Celest ‘n spysenieringsbesigheid nie, sy is ook ‘n boervrou wat haar kant bring met die boerdery.”
Die aalwyneiland, wat so netjies versorg word, is ‘n lus vir die oog en menige toeris stop daar om foto’s te neem, veral noudat die aalwyne in volle blom staan. Dié tuin is onder leiding van die Cradock-forum, in samewerking met talle vroue uit die gemeenskap, geskep om die roete deur die dorp te verfraai.
Lou Venter, voorsitter van die forum, sê daar word deurgaans pogings aangewend om die tuine te onderhou, maar dis nie oral ewe suksesvol nie. “Die effek wat die aalwyne skep wanneer dit vroeg in Oktober tussen die klippe en stompe blom, is van onskatbare waarde om kaal kolle wat vroeër ‘n seeroog was, in ‘n aantreklike lafenisterrein te omskep.
“Dit is vroue soos Celest, en vele ander, wat ons dorpe op die platteland versorg en staande hou en gaan regtig uit hul pad om ‘n lushof vir verbygangers en inwoners te skep.”
Dié lushof het ook baie besoekers getrek tydens die kanomaraton wat jaarliks in Cradock aangebied word.