Nuwe hoop vir Huis Triomf
OUDTSHOORN - Nuwe en opwindende veranderinge wag vir ACVV Huis Triomf nadat daar enkele maande gelede gevrees is dat die tehuis gaan toemaak as gevolg van finansiële druk en onvoldoende staatsibsudies. Twee maande gelede het Barn Christian Fellowship, ‘n kerkgroep in Gauteng, onderneem om dié kinder- en jeugsorgsentrum finansieel by te staan.
Hulle betrokkenheid en visie vir die Karoo se enigste kinderhuis vir seuns, is verlede week bevestig. Verskeie rolspelers is verlede Dinsdagaand na ‘n inligtingsessie by die Cape Karoo Ostrich Emporium genooi en dit is opgevolg deur Huis Triomf se algemene jaarvergadering verlede Donderdag. Volgens Roelof Kwant, pastoor van Barn Christian Fellowship, wat die vergadering gelei het, het die vorige bestuur “fantastiese fondamente vir die nuwe bestuur gelê”, en sal die nuwe bestuur wat Donderdagaand verkies is, hierop voortbou.
“Hulle het deur ‘n baie moeilike tyd hul bes vir die kinders gedoen. Die nuwe bestuur gaan op die boustene voortbou om ‘n nog groter sukses van die sentrum te maak.”
Barn Christian Fellowship het sowat drie maande gelede van Huis Triomf te hore gekom toe Marie Sukers, die ACDP se parlementslid vir die Karoo, hulle genader het. Sukers het gesê sy het Kwant genader vir hulp omdat sy weet dat Barn Christian Fellowship reeds groot suksesse met projekte vir kinders behaal het.
Die bestuur wat Donderdagaand verkies is, is Suné Rupping, Brende Brits, Kwant, Willie Coetzee, Handri Calitz, Crystal Muller, Nick Maritz, Leigh Candish en Ingrid Noble.
Kwant het verder gesê dat daar nuwe en opwindende vooruitsigte vir die sentrum is.
“Die munisipaliteit het onderneem om ons afslag op die water- en kragrekening te gee. Ons beplan ook om die sentrum ‘n nuwe naam te gee. Ons kyk op die stadium na ACVV Huis Elroi. Elroi is ‘n Hebreeuse woord wat ‘the God who sees me’ beteken en dit is presies wat die kinders nodig het, ‘n plek waar hulle glo God hulle sal raak sien.”
Volgens Kwant is dit ‘n groot prioriteit om ‘n ander perseel vir die tehuis te kry aangesien die huidige een nie geskik is vir kinders nie. Hy het genoem dat hulle reeds na moontlike persele gekyk het, maar dat dit ‘n lang proses is.