Borgtog laat vaar
OUDTSHOORN - Die moordsaak van Jacques Liebenberg (33) is op 27 Januarie in die Oudtshoorn-landdroshof hervat. Herman Redelinghuys (24), hoofverdagte in die moordsaak en ook die broer van Liebenberg, se verteenwoordiger, Johan Duvenhage van Duvenhage Keyser & Jonck prokureurs, het die borgtogaansoek laat vaar vir redes nie aan die media of publiek bekend nie.
Liebenberg se liggaam is Donderdag 12 Januarie omstreeks 02:15, langs die Kammanassie-pad in die landelike omgewing van Dysselsdorp deur Dysselsdorp-polisie gevind. Hy het veelvuldige wonde aan sy gesig en kop gehad en is op die toneel deur paramedici dood verklaar.
Drie verdagtes is op 13 Januarie, die dag na die moord, in hegtenis geneem. Twee van die drie verdagtes is egter vóór hulle op 16 Januarie in die hof sou verskyn, vrygelaat weens 'n gebrek aan bewyse. Volgens Chris Spies, Suid-Kaapse polisiewoordvoerder is daar nog op die stadium nie genoeg bewyse teen die twee mans om hulle met die saak te verbind nie.
Die motief agter die moord word nog ondersoek. Dit is ook nog onbekend of Liebenberg langs die Kammanassie-pad of iewers anders gesterf het.
Spies het ook in ‘n vorige persverklaring genoem dat daar moontlik nog arrestasies gemaak kan word.
Leon Campher, Oudtshoorn-raadslid en gemeenskapsleier het op 27 Januarie, dieselfde oggend van die hofverrigtinge, saam met ondersteuners voor die Oudtshoornlanddroshof bymekaargekom. Die rede hiervoor was om 'n petisie aan die hooflanddros, Ryan van Harte, te oorhandig om kapsie te maak teen die borgtogaansoek van Redelinghuys. Die versoekskrif is aanlyn en in 'n hardekopie deur Campher gedryf. Campher het aan Oudtshoorn Courant genoem dat hy ongeveer 2 100 handtekening ontvang het.
Liebenberg se vader, Koos Liebenberg van Orania in die Noord-Kaap en sy suster, Jackie Liebenberg van Mosselbaai, was ook tydens die oorhandiging van die petisie teenwoordig. Koos het aan Oudtshoorn Courant genoem dat hy weens verskeie redes nie 'n hegte band met Liebenberg gehad het nie, en dat hy deels van sy seun vervreem
was toe hy van sy moeder geskei het.
Hy het wel jaarliks 'n verjaarsdagboodskap aan sy seun gestuur, wat nooit oopgemaak of gelees is nie, het hy gesê.
'n Kranslegging het ook op 17 Januarie by die area waar sy liggaam gevind is, plaasgevind.
Die saak dien voor landdros Vaughn Shone. Die saak is tot 2 Maart vir verdere ondersoek van die Direkteur van Openbare Vervolging (DOV) uitgestel. Redelinghuys bly in aanhouding.
Die ondersoekbeampte, sers. Daniel Nel, vra dat enigiemand met leidrade of inligting hom by 079 093 9962 kan kontak.