Kinderland besoek Oudtshoorn
OUDTSHOORN - 'n Kleuteropleidingsprogram is Saterdag 28 Januarie deur Kinderland Akademie by die Thusongsentrum in Bongolethu aangebied.
Die opleiding is deur 43 kleuterskoolopvoeders bygewoon en het drie ure geduur. Kinderland Akademie sal vir die res van die jaar, aan die begin van die kwartaal, opleiding aan die 43 opvoeders verskaf. Die doel van die program is om opvoeders, wat met kleuters tussen die ouderdom van twee tot vyf werk, te onderrig om kwaliteit opvoeding aan kleuters te voorsien. Die fokuspunte van die program handel oor ontluikende wiskunde en geletterdheid en kan aanvullend tot die kleuterskool se eie dagprogram gebruik word.
Die program is gebaseer op die nasionale kurrikulumraamwerk vir kinders van geboorte tot vier jaar oud en is deur die Wes-Kaapse department van maatskaplike ontwikkeling vir opleidingsdoeleindes goedgekeur. Opvoeders het ook notas, 'n weeklikse lesprogram en kleurprente ter ondersteuning van die program ontvang sodat die konsepte beter verstaan word om dit aan kleuters oor te dra.
Kinderland Akademie is 'n niewinsgewende maatskappy (NWM) (2017/401115/08) wat in 2017 gestig is en die opleiding gratis, met behulp van borgskappe, aanbied. Die fokus van die program is om aan kleuteropvoeders in minderbevoorregte gemeenskappe opleiding te verskaf.
Hierdie NWM is verbonde aan Kinderland-kleuterskool in Wellington.
Dr. Thys Smith, voorsitter van Kinderland Akademie, het tydens sy besoek aan Oudtshoorn en George 'n opname gemaak om vas te stel hoeveel minderbevoorregte kleuters deur die ontluikende wiskunde opleiding van die opvoeders bereik sal word. In Oudtshoorn word 43 opvoeders bereik wat sowat 800 kleuters sal onderrig en in George word 73 opvoeders bereik wat sowat 1 400 kleuters sal onderrig. "Dus sal meer as 2 000 kleuters elke dag kwaliteit onderrig ontvang," verduidelik Smith.
Smith nooi ook besighede en individue wat graag 'n opvoeder vir die jaar wil borg, om hom by 083 661 8363 te kontak.