Badgers klop Eagles
Die Six Gunn Grill Garden Route Badgers-manskrieketspan het die afgelope naweek hul jaarlikse vriendskaplike wedstryd teen die SWD Eagles met 57 lopies gewen. In die proses het die Badgers die Daisy Business Solutions wisseltrofee behou.
Daar moet egter bygevoeg word dat die Eagles in hierdie wedstryd baie goeie rekenskap van hulself met bal en kolf gegee het. Die Badgers het eerste gekolf en 'n intimiderende telling van 217 vir die verlies van sewe paaltjies in hul toegelate 20 boulbeurte opgestapel.
Badgers se kolwers Jean du Plessis (54) en André Malan (37) se flitsende kolwe het Eagles se boulers behoorlik gekasty met die Eagles se veldwerkers wat gereeld die bal agter die grens moes optel.
Ook die bouler Marcello Piedt het 'n waardevolle warrelwindbeurt van 26 lopies aangeteken. Clemen Lewis (2/55) en Deon Carstens (3/17) was die Eagles se beste boulers.
In die Eagles se kolfbeurt het die Badgers se openingsbouler Basheer Walters vir groot vermaak gesorg toe hy met sy eerste bal van die beurt agt glipveldwerkers gehad het met slegs een veldwerker op die wegkant se grens. Walters het egter met die tweede bal weer sy veld uitgesprei soos normaalweg die geval sou wees.
Die Eagles se kolwers kon 160/8 in hul kolfbeurt aanteken en hiermee sonder twyfel gewys dat hulle definitief oor goeie basiese kolftegnieke beskik. Dit was veral Adriaan van der Bank wat met sy uitstekende beurt van 71 lopies, beïndruk het.
Vir die Badgers het Hanno Kotze (2/4),
Jean du Plessis (2/18), Marcello Piedt (2/20) en Jarred Jardine (2/11) die beste met die bal gevaar.
Ottniel Baartman, gebore Oudtshoorniet en 'n voormalige SWD-krieketspeler, wat nou vir die Sunrises Oos-Kaap in die SA20kompetisie speel, was die gas vir die dag. Baartman het ook die prysuitdeling behartig.