Die kruis is ‘n teken van hoop
OUDTSHOORN – ‘n Kruis van 14 m is binne twee dae op Grootkopheuwel (Spekkop) naby die Oudtshoorn-gevangenis, opgerig. Die oprig daarvan is op 5 Februarie voltooi. Volgens Ranger Grebe, visiedraer van iSurrender, sal dit binnekort met 'n beligtingsstelsel toegerus word om, soos hy sê, 'die donker nag te verlig'.
Grebe, het in samewerking met
AGS Oudtshoorn-gemeente en die ondersteuning van 'n klein groepie besigheidseienaars, vier jaar aan die oprig van die kruis beplan.
Omdat die kruis op munisipale grond en in ‘n natuurreservaat opgerig is, moes spesiale toestemming van die nasionale departement van vissery en bosbou asook die Oudtshoorn-munisipaliteit verkry word. Volgens hom was dit ‘n groot proses om aan die wetgewing en vereistes van beide instansies te voldoen; en is selfs die kruis se konstruksie deur ‘n ingenieur ontwerp en die bouplanne deur die stadsbeplanners goedgekeur.
Oudtshoorn-munisipaliteit het verlede jaar, na 'n publieke deelname en toestemming van die munisipale raad die groen lig vir die oprig daarvan verkry en so is vier jaar se beplanning uiteindelik aan die rol gesit.
Grebe vertel dat hierdie kruis 'n simbool van HOOP moet deurgee, en vorm nou deel van drie kruise wat in Oudtshoorn-omgewing opgerig is.
Volgens hom het hy uit verskeie oorde teenkanting vir die oprig van die kruis ontvang, maar dat alles nou in plek begin val. “Die pad wat ons gestap het om hier te kom was en is nie maklik nie, maar God se belofte was dat Hy alles in plek sal bring vir die oprig van die kruis,” vertel Grebe.
“Hierdie is net ‘n klein deel van die uiteindelike plan wat nog in plek moet val vir wat nog in Oudtshoorn gaan plaasvind. Die boodskap is dat God, Oudtshoorn lief het. “Dat Hy nie van die dorp vergeet het nie. Ons reageer op Sy belofte van herstel, kom ons verkondig sy naam,” sê Grebe.
In ‘n aanhaling van memorandum wat Grebe en verskeie sakelui op 16 Augustus 2019 aan die munisipaliteit oorhandig het, om toestemming vir die oprig van die kruis te vra, skryf hy: “iSurrender” is 'n hemelse visie om hoop terug te bring na Oudtshoorn. Dit is gebou op die konsep van korporatiewe gebedsgroepe wat mense weer bymekaar sal bring om die krag van gebed te aktiveer. Dit sal 'n dorp herstel en lewens verander.” "Laat daar lig wees tydens die donker en swaartye wat mense deurgaan, bring terug die Hoop, Sy naam is Jesus Christus."