Shumenè Pienaar skitter in SWD
Ontmoet Shumenè Pienaar, SWD Rugby se enigste vroulike skeidsregter-assessor. Pienaar beskik oor 'n BOKsmart vlak 7-rugbykwalifikasie, Match Officiating vlak 1 en het sy ook wêreldrugby se aanlynkursusse suksesvol voltooi. Sy vertel dat sy aanvanklik 'n liefde vir die sport aangeleer het terwyl sy as kind altyd saam met haar broer en pa na rugbywedstryde op TV gekyk het.
Haar aanstelling geld vir die volgende vyf jaar en om alles te kroon, is sy ook die tesourier op die skeidsregtersvereniging se bestuur - die enigste vrou in die bestuur se geskiedenis wat hierdie eer nog te beurt kon val!
Die meerderheid rugbyondersteuners, veral in Suid-Afrika, kritiseer gereeld skeidsregters se beslissings, en dit is hier waar assessors waarde toevoeg om seker te maak dat skeidsregters op hul tone gehou word om so konsekwent moontlik te blaas.
Die werk van 'n skeidsregterassesor behels onder meer dat hulle fisies na rugbyligawedstryde onder SWD se vaandel gaan kyk en dan ' n verslag opstel wat na die skeidsregters se afrigters gestuur word vir moontlike tekortkominge waaraan gewerk moet word.
"Die tegniese aspekte waarna gekyk word is die hantering van skrums en lynstane. 'n Skeidsregter se posisionering op die veld is ook van kardinale belang omdat jy in die gunstige posisie moet wees om die spel voor jou waar te neem sodat jy die korrekte besluite kan neem. As 'n skeidsregter nie korrek geposisioneer is nie, kan jy byvoorbeeld nie onkantspel, aanslane en diesmeer beoordeel nie. Reëls bly reëls, en skeidsregters blaas wat hulle voor hulle sien en implimenteer volgens sy diskresie op die ingewing van die oomblik wat nie altyd 'n maklike taak is nie."
Wat skeidsregters se veiligheid op die veld self betref, sê Pienaar dat daar altyd aanbeveel word om 'n wedstryd liewer af te blaas indien toekouers of spelers oproerig raak.
"Oor die algemeen is ons skeidsregters in goeie hande; indien ons onsmaaklike
voorvalle teekom is daar altyd sekuriteit wat die skeidsregters van die veld sal lei. Oral raak mens maar kwaad vir skeidsregters, selfs ek in my gemak van my huis, maar darem nie op 'n vlak waar mens tot geweld sal oorgaan nie. Aan die einde van die dag is die doel van rugby ontspanning en gekontroleerde passie en ook om ons mense te ondersteun."
Tans hou Pienaar die wêreldrugbybeker in Frankryk met arendsoë dop en is sy veral beïndruk met die spel wat die Springbokke opdis.
"Ons twee oortuigende oorwinnings oor Skotland en Sondag se wegholoorwinning van 76-0 teen Romenië voorspel gevaar vir almal. Dit sal beslis 'n verrassing wees as die Bokke nie ten minste die finaal haal nie," sê sy.