KAPS waarsku teen weggee van troeteldiere
Rasegte honde word toenemend deur dierewelsynsorganisasies gekonfiskeer en selfs uitgesit omdat hul oorspronklike eienaars hulle weggee aan mense wat nie hul sorg kan bekostig nie.
Colette Teale, stigter en voorsitter van Karoo Animal Protection Society (KAPS), wil troeteldiereienaars waarsku en inlig oor die aanneem van rasegte troeteldiere.
Volgens Teale het haar organisasie onlangs 'n paar voorvalle in Calitzdorp en Ladismith gehad waar opregte honde weggeneem of uitgesit moes word weens die feit dat hulle deur hul oorspronklike eienaars weggegee is en die nuwe eienaars nie die nodige sorg aan die honde kon bied nie.
In een voorval is 'n ouerige, rasegte Deense hond ontdek wat op 'n plaas aan 'n boom vasgeketting was, sonder voldoende skuiling. Die hond was in so 'n swak toestand dat hulle hom moes uitsit. Hy was nie net honger nie, maar was ook siek met bosluiskoors. Teale het gesê die hond se oorspronklike eienaar het hom aan 'n werker gegee sonder om vas te stel of die man dit kan bekostig om hom te voed en te versorg.
“Troeteldiereienaars wat emigreer of wat na ’n nuwe huis trek wat nie hul diere kan akkommodeer nie, moet baie bewus wees aan wie hulle hul diere gee. Dit is duur om 'n troeteldier te voer, toegang tot veeartsenykundige sorg te kry, en 'n troeteldier teen siektes te beskerm. Maak seker wie ook al jou troeteldier aanneem, weet dit en kan dit bekostig.”
KAPS is 'n dierewelsynsorganisasie wat tussen Barrydale na Ladismith met troeteldiere in landelike gemeenskappe sowel as plase werk.
Volgens haar het hulle ook onlangs 'n Sharpei, een van drie honde wat 'n werkgewer aan haar werknemer gegee het, weggeneem. Die hond het 'n ernstige velkwaal gehad.
"Sommige van hierdie troeteldiere is vertroetelde troeteldiere wat geen ander lewe ken as om binne op 'n warm bed te slaap nie, en dan skielik moet hulle buite slaap en word hulle vasgeketting en aan wind en weer, waaraan hulle nie gewoond is nie, blootgestel. Kan jy jou indink hoe verward en bang hulle moet wees?” het Teale gesê.
Samantha Mann, wat vrywillig by
The Outreach Program (TOP) in die Helderberg-omgewing werk, het gesê sommige troeteldiereienaars glo dat almal troeteldiere dieselfde gaan hanteer en net omdat hulle lief is vir diere ook die diere op beddens gaan laat slaap en op banke gaan laat lê.
“Nie net kan hierdie huishoudings nie behoorlike kos of veeartse se rekeninge bekostig nie, hulle het dikwels nie ’n veilige ruimte of veilige tuin om troeteldiere aan te hou nie, so die troeteldiere dwaal weg of word gesteel.”
Sy beveel aan dat hierdie diere-eienaars deur betroubare dierewelsynsorganisasies wat sal aandring op aannemingsaansoeke en huisondersoeke voordat troeteldiere aan nuwe eienaars oorhandig word. "Dit is om seker te maak dat 'n troeteldier na 'n huis gaan wat sy behoeftes vir die res van sy lewe kan voorsien," het Mann gesê.
Voor aanneming sal dierewelsyn verseker dat die nuwe huis 'n veilige erf het, die toestand van die nuwe eienaars se huidige troeteldiere nagaan, verseker dat daar skuiling en vars water beskikbaar is en dat hul inentings op datum is.
Die welsynsorganisasie sal dan oor die algemeen in kontak bly met daardie troeteldiereienaar en geborgde veeartsenykundige sorg en kos beskikbaar stel aan diegene wat finansieel sukkel.
Dr. Hilldidge Beer, veearts wie se EberVet CVC massa-troeteldiersterilisasieprojekte vir KAPS uitvoer, het gesê openbare ondersteuning van hierdie projekte is een van die beste maniere om te verseker dat alle troeteldiere goed versorg word.
“Sterilisasie verminder nie net die aantal ongewenste troeteldiere nie, dit is ook ’n geleentheid vir opvoeding en ondersteuning. Troeteldiere wat na hierdie gratis klinieke gebring word, word ook teen parasiete en hondsdolheid beskerm en gratis sakke kos gegee om huis toe te neem. Só maak verarmde troeteldiereienaars kontak met dierewelsyn en is hulle dan verseker van deurlopende ondersteuning.”
Indien troeteldiereienaars hulp met aannemings nodig het kan hulle KAPS by 072 604 7210 kontak.
Maak seker wie ook al jou troeteldier aanneem, kan dit bekostig