Dam byna vol in 100ste jaar
Die Kammanassiedam buite Oudtshoorn is vanjaar 100 jaar oud en was teen Dinsdag 99,18% vol. Dié dam het laas in November 2015 oorgeloop.
Die dam is in 1923 voltooi en die finale afwerkings en afrondings rondom die dam is in 1925 voltooi. Die primêre doel van die dam was, en is nog steeds, om water vir besproeiing te voorsien.
Kort geskiedenis
Volgens 'n boek deur Okkie Stander, Kammanassiedam Oudtshoorn, het ETL Edmeades, van die plaas Kammanassie, in 1898 die behoefte vir 'n dam aangespreek om 'n surplus water op te vang om later vir verbouing van landbouprodukte te gebruik. Dit is ook op sy plaas waar die dam gebou was. Die plaas behoort tans aan die Stompdrift-Kamanassie Watergebruikersvereniging (SKWGV).
Die plek waar die dam gebou sou word is in 1912 opgemeet, en volgens die landmeter se berekeninge sou die hele projek £200 000 kos. Die reënopvangstasie is oor 'n periode van agt jaar opgerig om die hoeveelheid reën per jaar te meet. 'n Kloksisteem is gebruik om die invloei van die water in die rivier vas te stel. Die Kammanassierivier is as die perfekte rivier beskou om die dam in te bou. Dié
rivier ontspring oos van Uniondale en vloei tot in Oudtshoorn waar dit in die Olifantsrivier vloei ongeveer 'n 100 km. In 1915, tydens 'n ernstige droogte, het Edmeads weer die voorstel opgebring waarna dit in 1917 goed gekeur is. 'n Amptelike besproeiingsraad is in 1917 gestig. Edmeads was die voorsitter van die raad.
Die raad bestaan steeds en staan nou as die Stompdrift-Kamanassie
Watergebruikers-vereniging (SKWGV) bekend. Die raad bestaan uit die grondeienaars in die distrik.
'n Dorpie (Village) is gevestig wat verblyf aan 31 families en 40 enkellopende mans met kwalifikasies en ervaring, gebied het.
Rondawels is opgerig vir ongeskoolde werkers. In die dorpie was daar 'n gevestigde skool, polisiestasie, gholfbaan en poskantoor. Ongeveer 400 werkers het aan die dam gebou, soms was daar tot 800 werkers op die perseel.
Die eerste beton is op 6 Mei 1920 gegooi. Plaaslike boere is as kontrakteurs gebruik om die sement met donkiekarre van die treinstasies af aan te ry. Twee jaar later is die bouproses tot stilstand geroep na 'n griepuitbraak, maar dit het die bouers nie gekeer om die dam betyds klaar te maak nie.
Interessante feite
Daar was net een noodlottige ongeluk tydens die bou van die dam. Plofstof wat onverantwoordelik gebruik is, was die rede vir die sterfte.
Een persoon het sy arm verloor. CJ Langenhoven was die regsadviseur terwyl Ninham Shand die assistent-ingenieur was.
Besproeiingdistrik
Die Kammanassiedam voorsien tans water aan 10 800ha.