Geestesgesondheid in die kollig
Die lewe kan soms baie moeilik wees en ons moet weet hoe ons ons eie geestelike welstand kan verbeter.
In die lig van Geestesgesondheidsbewusmakingsmaand is verskeie uitreike in Kannaland gedoen om die gesprek rondom geesteswelstand te begin.
Volgens Nadia Ferreira, woordvoerder van die Wes-Kaapse gesondheidsdepartement, Tuinroete- en Sentraal Karoo-distrikte, het verskeie uitreike in Oktober in Zoar, Calitzdorp en Ladismith plaasgevind.
Dennis Jacobs van Zoar is uitgesproke wanneer dit kom by veral mans en geestelike welstand. "Dit maak jou nie minder van 'n man om oor jou probleme te praat nie," het hy gesê.
Oor die belangrikheid van hierdie uitreike het sielkundige Estelle Crause gesê: "Dit is belangrik dat mense bewus gemaak word van hoe hulle na hul geestelike welstand kan omsien en waarheen hulle kan gaan as hulle voel dat hulle dalk hulp nodig het. Ons hou hierdie uitreike om bewustheid by ons gemeenskappe te skep."
Verbeter jou geestesgesondheid
Crause het gepraat oor wat jy kan doen om jou geestelike welstand te help verbeter.
"Voeding speel 'n belangrike rol in die handhawing van geestelike welstand en die voorkoming van die aanvang van geestesgesondheidsversteurings. Ek sê altyd vir my pasiënte om kosse te eet wat hoog is in L-tirosien soos hoender, vis, kaas, piesangs en melk.”
Dit is ook belangrik om bedag te wees op jou aandroetine. Beperk koffie, alkohol en suiker in die nag sowel as skermtyd. Hou 'n aandroetine wat jou senuweestelsel geleidelik kalmeer en probeer om strawwe oefening voor slaaptyd te vermy. Dit verhoog jou liggaamstemperatuur wat jou dalk 'n bietjie langer wakker kan hou.
Waar om ondersteuning te kry:
As jy ’n leerder is wat mishandeling ervaar, en/of raad of beradingsondersteuning nodig het, kan jy die Wes-Kaap onderwysdepartement se Veilige Skole tolvrye blitslyn by 0800 45 46 47 skakel.
Het jy hulp of raad nodig oor verhoudings, seks, swangerskap of jou liggaam? Stuur 'n 'bel my asseblief' na 083 323 1023 om met 'n opgeleide gesondheidskenner te praat, skakel 0800 121 900 of besoek bwisehealth.com
Voel jy alleen, oorweldig of angstig? Kry gratis hulp van die Cipla Geestesgesondheidshulplyn. Praat met 'n opgeleide berader. Stuur 'n SMS na 31393 (24/7), skakel 0800 456789 (24/7) of WhatsApp 076 882 2775 (08:00 tot 17:00)
Het jy geweet jy kan die gratis 24/7 selfmoordhulplyn bel?
Praat met 'n opgeleide berader wat jy kan vertrou. Skakel 0800 567567 enige tyd van die dag of nag.