Oudtshoorn-stasiebevelvoerder tree af
Brigadier Susan Crafford, wat vir die laaste drie en ’n half jaar stasiebevelvoerder in Oudtshoorn was, en met 'n loopbaan van 37 jaar in die polisiediens kan spog, tree op 31 Desember amptelik af.
Crafford sal haar aftrede in Mosselbaai gaan geniet, maar vertel dat sy onder andere die verhoudings wat sy met verskeie instansies, organisasies, groepe, en die inwoners van die Klein-Karoo in Oudtshoorn opgebou het baie sal mis.
"Ek gaan nou eers net so ’n bietjie rus en my batterye herlaai, dan sal ek besluit wat ek gaan doen vir die res van my lewe. Ek weet nog nie wat nie, maar dit sal iets anders wees. Ek gaan definitief nie stilsit nie!" skerts sy.
Oudtshoorn Courant het met haar gaan gesels oor onder meer die hoogte- en laagtepunte van haar loopbaan, en waarop die Oudtshoorn-polisie sal moet fokus in die toekoms.
Haar ondervinding van haar hele loopbaan, vertel sy, was "een fantastiese tyd!"
"Ek kan net nie glo ‘n mens se lewe gaan so vinnig verby nie. Dis nou drie, amper vier dekades, en as ek sien waar ek gewerk het; van Johannesburg, in die Oos-Kaap - ek dink daar's nie 'n plek waar ek nie gewerk het nie - dink ek die ondervinding wat ek opgedoen het was fantasties."
Oor haar 37 jaar van diens het Crafford al in die sigbare polisiëringseenheid gewerk, speurtak, in bestuursdienste en het selfs projekplanne opgetrek. "Daar is nie 'n afdeling waar ek nog nie gewerk het nie, so ek kan nie glo dat tyd so vinnig verby is nie," sê sy.
Laagte- en hoogtepunte in haar loopbaan was baie, bieg sy. Onder die laagtepunte tel die tyd wat sy in Johannesburg spandeer het, veral Sophiatown, as een van hulle.
Sy het 12 jaar as stasiekommissaris daar spandeer.
"Daar tel mens in
'n maand maklik
30 lyke op, so dit was 'n baie, baie slegte tyd, maar ek dink dit is ook waar ek meeste van my ondervinding opgedoen het.
In Oudtshoorn byvoorbeeld dra polisiebeamptes nie altyd hul koeëlvaste baadjies of selfs wapens nie - ons is eintlik so bevoorreg, maar daar was dit anders. Daardie stresvolle tye was van my laagtepunte."
Daar was tog hoogtepunte aan daardie tydperk van haar loopbaan, soos byvoorbeeld die mense wat in hegtenis geneem is. Daar was talle bendes wat onder haar bevel basies ontbind is. Sy vertel daar is baie hofsake wat uit die polisie se optredes daar tot volmaking gekom het. "Daardie suksesse was goed gewees. Ek was al in Oudtshoorn toe van daardie hofsake afgehandel is en daardie mense van die strate verwyder is."
Sy het verder in Booysens, Johannesburg, gewerk waar daar baie kapings, huisrowe en dwelmhandel was.
"Ook die groot sportgeleenthede, onder meer die sokkerwêreldbeker waar jy verantwoordelik is vir 120 000 tot 130 000 mense se veiligheid, was baie uitdagend." Dit was ook vir haar 'n hoogtepunt.
Dit is hierna dat sy na Oudtshoorn gekom het. "Die hoogtepunte hier, al het ons baie tekorte, is dat ek fantastiese mense het wat onder my en saam met my werk. Die misdaadvoorkoming waarmee ons tans besig is verloop baie goed. Ons arrestasies is uitstekend - ons trek mense gewoonlik vinnig vas. Veral met dwelms en messe. Ons samewerking met verkeer, buurtwagte, die vier verskillende sektore en ander organisasies is wonderlik."
Dit is een ding wat vir haar veral uitstaan in Oudtshoorn, sê Crafford, die samewerking tussen elke organisasie waarmee sy al in aanraking gekom het van sekerheidsmaatskappye tot verkeer, van die gemeenskapspolisiëringsforum tot buurtwagte, en selfs met korrektiewe dienste om maar net 'n paar te noem.
"Maar mens kry almal 'n tyd in jou lewe waar jy voel iemand anders kan oorneem. Daar is baie jong leierskap wat ingebring kan word, wat net goed kan wees vir Oudtshoorn. Daar is genoeg kundigheid in die diens vir mense om by my oor te vat," voeg sy by.
Die grootste uitdaging vir Oudtshoornpolisie, volgens Crafford, is om offisiersposte te vul, 'n nuwe vloot (voertuie) aan te skaf - waarna alreeds gekyk word, en om "nuwe bloed" in die diens te kry. "Al ons lede werk onder geweldige druk, en ons kort offisiere en beamptes in elke afdeling. Dit is alles goed om na uit te sien."
Sy glo Oudtshoorn se inwoners gaan ook van kardinale belang in die toekoms van Oudtshoorn se veiligheid wees. Volgens Crafford is die gemeenskap se samewerking die sleutel tot goeie vooruitgang.
"Inwoners moet ook bewus wees van die goeie werk wat ons beamptes doen. Hulle is immers ook deel van die gemeenskap. Ons het beslis Oudtshoorniete se samewerking en ondersteuning nodig."
Vir nou sien Crafford uit na die rustigheid wat haar aftrede sal bring.
"Om stasiekommissaris of -bevelvoerder te wees vat aan 'n mens. Jy moet 24 uur per dag beskikbaar wees. Ek tree al as stasiekommissaris op sedert die vroeë 1990's. Ek sien uit daarna om bietjie met verlof te gaan en tyd saam met familie te spandeer."
Crafford verseker wel dat sy steeds beskikbaar sal wees vir almal wat al oor haar pad gekom het in Oudtshoorn. "Ek sal dit mis om daar te wees vir mense. Mens leer uit elke klagte selfs, dit sal ek mis. Die kontak met mense en kameraadskap sal ek ook baie mis."