Munisipale amptenaar se kontrak beëindig
Die direkteur van infrastruktuur, Justin Lesch, se kontrak is Maandag beëindig na 'n spesiale raadsvergadering wat in komitee gehou is. Die nuus is wyd op sosiale media versprei en het geweldige reaksie uitgelok.
Lesch is in 2021 aangestel, maar het na bewering nie die nodige kwalifikasies gehad nie. Volgens inligting wat bekom is, is hy 18 maande gegun om die nodige vakke te voltooi sodat hy die regte kwalifikasie kon hê, maar het dit nie gedoen nie.
Die munisipale bestuurder, Walter Hendricks, het gesê: "Die munisipaliteit bespreek nie personeel aangeleenthede in die pers nie."
Hy het wel gesê dat Lesch die korrekte kwalifikasies het, maar ekstra kwalifikasie word benodig wat 'n direkteur in 18 maande moet bekom.
"Mnr. Lesch het dit na 18 maande bekom." Burgemeester Chris Macpherson het gesê: "Alle stadsrade word streng gereguleer deur voorgeskrewe reëls en wetgewing. Daar is ‘n streng gedragskode vir raadslede en amptenare waarvan vertroulikheid ‘n uiters belangrike beginsel is. Die raadsbesluit wat nou wyd versprei word, is tydens ‘n in-komitee-raadsitting hanteer. Enige dokument, bespreking of inligting wat tydens ‘n in-komitee-vergadering bespreek word, is uiters vertroulik. Persoonlike kwessies oor personeel word juis in komitee hanteer om persone te beskerm."
Volgens hom is die verspreiding en bekendmaking daarvan sonder die nodige toestemming van die raad ‘n onwettige handeling en sal tot onmiddellike skorsing lei van enige raadslid wat dit oortree.
Macpherson het verder gesê die misbruik van hierdie vertroulikheid vir politieke gewin is uiters laakbaar en hy sal die nodige stappe neem om dit te voorkom.
"Dit is ook duidelik dat die inligting wat gegee en (op sosiale media) gepubliseer is, totaal eensydig is en nie die werklike agtergrond reflekteer nie."
Hy het egter feite rakende die aangeleentheid gedeel "aangesien die kwessie nou reeds in die openbare domein is". "Die staatsregsadviseur se opinie oor die beëindiging van die kontrak is vervat in ‘n skrywe van die provinsiale tesourie en is voor die raad gelê wat onder andere die volgende regulasies voorhou waaraan die raad gehoor moes gee: (3.4.1) '… A municipal council therefore does not have the authority to extend or deviate from the prescribed time period of 18 months to attain the minimum competencies level .'
“Die amptenaar ter sprake se 18 maande tydperk het reeds in Februarie 2023 verstryk.”
Volgens dieselfde opinie van die staatsregsadviseur word bepaal dat indien 'n individu nie geskik is vir 'n pos nie, en 'n munisipaliteit voortgaan om hierdie persoon aan te stel sal die aanstelling as nietig geag word in bepalings van die Stelselswet.
"Daar word ook duidelik gestel dat nie eens die munisipale bestuurder hierdie bepaling kan ignoreer of aanpas nie. Indien ‘n individu se reg tot vertroulikheid en wetgewing deur plasings op sosiale media misken word, is ons werklik niks beter as ‘n piesangrepubliek waar reëls en regulasies nie van toepassing is nie.
Dit is jammer dat plasings op sosiale media nie soos hoofstroommedia deur ‘n gedragskode gereguleer word nie. Dit is wel elke individu se reg om ‘n mening te gee, mits dit volgens aanvaarde norme en met verantwoordelikheid gedoen word,” het Macpherson gesê.