Hittige tweekamp weer ‘n wenner
Die Highgate Interprovinsiale Tweekampbyeenkoms wat die afgelope naweek by die De Jager-sportkompleks se tartanbaan gehou is, was ten spyte van snikhete weerstoestande, weereens 'n wenner!
Vanjaar was die 31ste keer dat hierdie gewilde tweekampbyeenkoms aangebied is met meer as 540 atlete van altesaam sewe provinsies wat aangetree het.
Die verrigtinge het om 08:00 begin waarna al die atlete eers soos tradisionele gebruik, 'n rondte om die baan gestap het onder luide applous van die skare teenwoordig.
Burgemeester Chris Macpherson het om 08:20 die byeenkoms geopen waarna die naellope en velditems onmiddellik weggespring het. Netso na 12:00 het al die atlete na die NA Smit-swembad beweeg vir die tweede been van die byeenkoms.
Die Westelike Provinsie het, soos verlede jaar, weer die spankompetisie gewen met Boland en Eden wat onderskeidelik die tweede en derde plekke ingepalm het.
In die hoërskolekompetisie was Durbanville bobaas met Outeniqua in die tweede plek gevolg deur Framesby wat derde was. Laerskool Paarl Gim was die wenners in
hul kategorie. Kenridge en George-Suid het die tweede en derde plekke ingepalm. Die deurwinterde Eden-atleet, Johan Windt, is aangewys as die tweede beste atleet van die byeenkoms.
Vanjaar spog Eden met nie minder nie as 15 medaljes waarvan vier goud, sewe silwer en vier brons is.
Eden se medaljewenners is as volg:
Seuns o. 9 Lian Hattingh (goud)
Seuns o. 11 Benjamin Bond (brons) Seuns o. 13 Wanru Haasbroek (silwer) Dogters o. 15 Arabelle Grutter (silwer) Seuns o. 17 Carlo Bezuidenhout (silwer) Seuns o. 19 Wido Rudolph (brons) Jo-Mari Smith (goud)
Melisa Meyer (brons)
Joshua Vorster (silwer)
Marsel Roos (goud)
Gavin Gericke (silwer)
Herman Spangenberg (brons) Anita Louw (silwer)
Cliff Walace (silwer) Johan Windt (goud)
Ludorums
Junior victor ludorum - Reynard Grobler Boland o.11
Junior victrix ludorum- Keira van Heerden OP o.19
Senior victor ludorum- Michael Archer WP M60+
Senior victrix ludorum - Kathleen Gey van Pittius Boland M70.