Karin Bence maak geskiedenis in fietsrykringe
Karin Bence, inwoner van Oudtshoorn en bekende in fietsrykringe, het onlangs geskiedenis gemaak toe sy haar lisensie ontvang het om as enigste vrou in Suid-Afrika, hoofskeidsregter in MTB, pad en baanwedrenne te beoordeel.
Bence doen al vir die afgelope 15 jaar beoordelingswerk as skeidsregter en is ook die vrou, van nog 'n legende in fietryadministrasie, Corné Bence.
Haar ervaring sluit in vele Suid-Afrikaanse fietsrykampioenskappe sowel as internasionale wedrenne soos die Attakwas en die Pioneer Trek. Om die kersie op die koek te sit, is sy boonop ook Eden-fietsry se hoof van tegniese aspekte en dien sy ook op Wes-Kaap-fietsry se paneel van beamptes.
Vanjaar is sy aangestel deur Fietsry SA as hoofskeidsregter van die Cape Town Cycle Tour, voorheen die Cape Argus.
Bence sê dat haar prestasie, die som van haar harde werk is.
"Ek kom uit 'n gesin wat fietsry-mal is en ek het by almal verskillende aspekte van die sport oor die jare geleer. My grootste mentor en inspirasie is egter my man, Corné wat my passie ondersteun - ook my gesin wil ek bedank vir hul bystand vir die lang tye wat ek soms van die huis weg is om fietsry te dien. Ek hoop van harte dat hierdie prestasie baie deure vir vroue in fietsry in Suid-Afrika sal oopmaak. Dis net 'n bewys dat waar daar 'n wil is, is daar ook 'n weg. Alles begin met ‘n klein treetjie vanwaar 'n mens kan groei tot ongekende hoogtes," het sy gesê.
Bence sê verder dat Fietsry SA haar verlede jaar genomineer het vir internasionale kursusse in Switzerland wat sy weens werksverpligtinge nie kon bywoon nie.
Volgens haar het Fietsry SA aangedui dat sy weer vanjaar genomineer sal word wat sy definitief sal bywoon.
Die voltooiing van hierdie kursus sal haar dan in staat stel om groot internasionale fietstoere soos Tour de France te kan beoordeel wat vir Bence, 'n droom sal wees wat binnekort 'n realiteit sal word.