Sportmotors en motorfietse uit plastiek
John Donson se handgemaakte plastiekvuurwaens, wat die afgelope naweek op sosiale media ten toon gestel is, het die oë behoorlik laat rek in verwondering vir die vaardigheid en wat dit behels om dit te ontwerp.
Dié vaardigheid is iets wat hy vir jare reeds doen, maar het dit vervolmaak tydens sy tydperk in die gevangenis.
"Een iets wat ek in die gevangenis geleer het, is geduld en hoe om jou brein te gebruik om alles tot op die letter te deurdink. Al die bewaarders, inmates, my ma-hulle, vriende en die hele buurt is baie trots op my handewerk en dit spoor my elke dag aan om my doel en drome te bereik."
Donson, wie se bynaam sedert kindsbeen "Johnny Motorbike" is, vertel dat hy vir donkiejare 'n gesonde obsessie oor motorfietse het en dat sy natuurlike belangstelling hom aangepor het om meer te weet oor hoe dit aanmekaargesit word.
Hy beskik oor vele motor- en motorfietsmodelle wat hy van herwinbare materiaal maak en het ook 'n reeks miniatuur motorfietsies wat hy met die grootste geduld en perfeksie gebou het.
Die herwinbare materiaal sluit in enige iets van 'n plastiekbottel of koeldrank- of tandepastaproppies. Om die struktuur te bou gebruik hy stokkielekkerstokkies en vir gedetaileerde komponente soos die enjins, span hy die materiaal van sigaretaanstekers in.
Vir sy kleiner modelle gebruik hy fyn afvaldraad en knip hy die plastiek uit koeldrankbottels.
Donson sê dat al sy modelle verkieslik vir versamelaars is wat dit by hul huise, kantore of enige plek wil uitstal. Hy maak ook voorsiening vir diegene wat hul motorfietsies (sommige vou selfs op) te alle tye by hulle wil dra deur sy modelle in onder andere Vicks en Vaseline-houers te bou; kompleet met 'n geïnstalleerde liggie wat sorg vir 'n indrukwekkende visuele effek.
Interessant genoeg gebruik hy geen gom en geen gereedskap nie, net sy twee hande. Al die strukture word geheg deur staalkrammetjies. Hy sê dat dit veral sy Lamborghini, Harley Davidson-, Suzuki- en Quatro-bike-modelle is wat groot aftrek in sy buurt, tussen vriende en familielede kry. Benewens die feit dat Donson sy eie niche geskep het in terme van entrepreneurskap, help hy ook op sy klein manier om platiekbesoedeling in die omgewing te
verminder. Die groot probleem met plastiek is dat dit nie maklik deur natuurlike prosesse afgebreek word nie en skade veroorsaak as dit nie herwin word nie.
Selfs al word dit verband, stel dit giftige gasse in die natuur vry.
“Ek het lank getob oor watter tipe materiaal ek wou gebruik om my passie uit te leef en daar was 'n tyd wat ek selfs hout oorweeg het. Maar dit sou weer beteken dat ek gereedskap moes koop wat ek nie het nie en ook die feit dat hout nie so vrylik beskikbaar is nie. Dis toe ek op plastiek besluit het omdat ek gesien het dat mense dit vrylik weggooi. So het ek die afval opgetel en by 'n paar mense ook afvalmateriaal gekry en toe het ek net begin bou. Dit vat my omtrent so 'n uur of twee om die groter modelle te bou en die kleintjies kan soms langer duur weens die ekstra detail en fynere werkies. Sommige kere kry ek net 'n prentjie in my kop van 'n sportmotor of fiets en dan wil ek dit sommer onmiddellik bou ongeag watter tyd dit is,” skerts hy.
Die konsep van sy V8-enjins, verkoelers en alternators in sommige modelle is ook iets wat hy per toeval ontdek het.
“Eendag het ek 'n sigaret lighter opgetel wat se gas op was en die aluminiumwieletjies het my aandag getrek. Ek het toe die lighter versigtig uitmekaar gehaal en waardevolle parte gekry soos die springs en verskillende tipes harde plastiek wat my nou handig te pas kom.
“Ek het nog groot planne om my ontwerpe na die volgende vlak te neem afhangend van die publiek se reaksie. Daar is ook planne om modelle te ontwerp sodat kinders elke dag daarmee kan speel sonder dat dit breek, maar vir dit het jy natuurlik sterker materiaal nodig.”
As jy dalk plastiekmateriaal aan Donson wil skenk of vir meer besonderhede oor sy modelle kan jy hom by 074 303 2336 skakel.